14 xalên peymana Amerika û Îranê hatin eşkerekirin

RûpelNews - Xala 1an: Amerîka, Îran û hevalbendên wan dê ragihînin ku operasyonên leşkerî li ser hemû eniyan, tevî Lûbnanê jî, bi giştî û bi awayekî mayînde bi dawî dibin. Ali dê soz bidin ku li dijî hev ti şer an operasyonên leşkerî yên nû dernexin, xwe ji gefan û bikaranîna hêzê dûr bigirin, û serwerî û yekparçebûna axa Lûbnanê garantî bikin.

Xala 2an: Dewletên Yekbûyî yên Amerîkayê (DYA) û Îran soz didin ku rêzê li serwerî û yekparçebûna axa hev bigirin û xwe ji destwerdana di karûbarên navxweyî yên hev de dûr bigirin.

Xala 3an: Aliyan li hev dikin ku di nav 60 rojan de ji bo gihîştina lihevkirineke dawî danûstandinan bikin. Ev dem bi lihevkirina dualî dikare were dirêjkirin.

Xala 4an: Yekser piştî îmzekirina peymanê, DYA dê dest bi rakirina dorpêçên xwe ya deryayî ya li ser Îranê bike, û hemû asteng û qedexe dê di nav 30 rojan de bi temamî bên rakirin. Di vê heyamê de, çûnûhatina keştiyan dê vegere asta xwe ya normal a beriya şer. Wekî din, DYA dê soz bide ku di nav 30 rojan de piştî gihîştina lihevkirineke dawî, hêzên xwe ji herêmên nêzîkî sînorê Îranê vekişîne.

Xala 5an: Piştî îmzekirina bîranînê, Îran dê hewl bide ku ji bo heyama 60 rojan derbasbûna ewle ya keştiyên bazirganî yên di navbera Kendav û Deryaya Umanê de, bê berdêl misoger bike. Tehran dê di nava 30 rojan de hemû astengiyên teknîkî û leşkerî rake û operasyonên paqijkirina mayinan bi dawî bike. Îran dê herwiha dest bi danûstandinan bi Uman û dewletên Kendavê re bike ji bo diyarkirina modela rêveberiya paşerojê ya ji bo Tengava Hormuzê di çarçoveya hiqûqa navneteweyî de.

Xala 6an: DYA, ligel hevkarên xwe yên herêmî, dê soz bide ku planeke berfireh a bi nirxê herî kêm 300 milyar dolarî ji bo jinûveavakirin û pêşketina aborî ya Îranê amade bike. Mekanîzmaya cîbicîkirina planê dê di nav 60 rojan de û wekî beşek ji peymana dawî were diyarkirin. Washington dê hemû lîsans û destûrên pêwîst ji bo danûstandinên darayî û veguhestina pereyan peyda bike.

Xala 7an: DYA soz dide ku hemû ambargoyên li ser Îranê rake, di nav de biryarên Encûmena Ewlekariyê ya Neteweyên Yekbûyî, biryarên Lijneya Rêveber a Ajansa Enerjiya Atomî ya Navneteweyî, û ambargoyên seretayî û duyemîn ên DYAyê. Dema rakirina ambargoyan dê wekî beşek ji peymana dawî were diyarkirin.

Xala 8an: Bi şertê ku Îran bi ti awayî hewl nede ku çekên nukleerî bi dest bixe an jî pêş bixe, Dewletên Yekbûyî û Îranê li ser çarenûsa stokên uranyuma dewlemendkirî ya Îranê li hev kirine. Wekî şertê herî kêm, tê pêşbînîkirin ku asta dewlemendkirina uranyuma navborî li cihê xwe yê niha û di bin çavdêriya Ajansa Enerjiya Atomî ya Navneteweyî de were kêmkirin. Peymana dawî dê her weha hewcedariyên navokî yên pêşerojê yên Îranê jî bi cih bîne.

Xala 9an: Heta ku peymana dawî neyê îmzekirin, her du welat dê statukoya heyî biparêzin. Li gorî vê yekê, Îran dê bernameya xwe ya navokî di asta heyî de bihêle, di heman demê de DYA dê cezayên nû ferz neke an jî hêzên leşkerî yên zêde li herêmê bi cih neke.

Xala 10an: Yekser piştî îmzekirina Bîranînnameyê û heta ku cezayên aborî bi tevahî bên rakirin, Wezareta Xezîneyê ya DYAyê dê lîsansên fermî yên hinardekirinê ji bo petrola xav a Îranê, berhemên pêtrokîmyewî û xizmetên girêdayî yên bankevanî, sîgorte û veguhestinê bide. Armanc ew e ku dawî li pratîka firotina petrola Îranê bi erzanîyên mezin ji Çînê re were anîn û misoger bike ku Tehran bikaribe petrola xwe bi bihayên normal ên bazarê bifiroşe.

Xala 11an: DYA soz dide ku hemû fon û sermayeyên cemidandî yên Îranê bi tevahî ji cemidandinê derxe. Rêbaza ku ev fon dê bên berdan dê di dema danûstandinan de were diyarkirin, û Banka Navendî ya Îranê dê bikaribe van çavkaniyan ji bo her armanceke ku li gorî wê guncaw be, bi kar bîne.

Xala 12:an Aliyan li hev kirine ku mekanîzmayeke cîbicîkirin û şopandinê ava bikin da ku çavdêriya cîbicîkirina bendên memorandumê û pabendbûna bi peymana dawî ya paşerojê re bike.

Xala 13an: Piştî îmzekirina bîranînê û destpêkirina cîbicîkirina Xalên 1, 4, 5, 10 û 11, Washington û Tehran dê danûstandinên fermî dest pê bikin bi mebesta gihîştina lihevkirineke dawî li ser xalên mayî.

Xala 14an: Peymana dawî dê bi rêya biryarnameyeke girêdêr a Encûmena Ewlekariyê ya Neteweyên Yekbûyî were pesendkirin û bikeve meriyetê.