Mazlûm Ebdî: HSD hate fesihkirin
RûpelNews - Mazlûm Ebdî, Fermandarê Giştî yê Hêzên Sûriyeya Demokratîk (HSD), îro ragihand ku piştî civîneke li Şamê ligel Serokê Sûriyeyê Ehmed Şara, HSD hatiye feshkirin.
Ebdî di civîneke çapemeniyê de li Şamê ragihand ku HSDê wekî saziyeke leşkerî ya serbixwe çalakiyên xwe rawestandine û diyar kir ku li gorî rêkeftina ligel Ehmed Şara, pêvajoya tevlîkirina hêzên HSDê bo nava artêşa Sûriyeyê bi dawî bûye.
"HSD wekî hêzeke serbixwe hatiye feshkirin."
Ebdî da zanîn ku HSDê ji destpêka damezrandina xwe ve di têkoşîna li dijî rejîma Baas û DAIŞê ya li Sûriyeyê de roleke girîng lîstiye û anî ziman ku bi hezaran şervan di vê pêvajoyê de jiyana xwe ji dest dane.
Ebdî tekez kir ku divê serdema nû ne li ser şer, lê li ser jinûveavakirinê be, û diyar kir ku HSD ji qonaxa parastina Sûriyeyê derbasî qonaxeke nû dibe ku tê de dê beşdariyê di jinûveavakirina welêt de bike.
Derbarê perwerdeya bi zimanê kurdî de peyam
Ebdî eşkere kir ku di danûstandinên ligel rêveberiya Şamê de, mijara mafê perwerdeya bi zimanê Kurdî jî hatiye rojevê.
Ebdî bal kişand ser wê yekê ku mafê perwerdeya bi zimanê Kurdî ji bo gelê Kurd her tim xwedî girîngiyeke mezin bûye û got ku Serok Ehmed Şara soz daye ku ev maf dê were parastin û pêkanîn.
Ebdî ragihand ku ew ê ji bo pêkanîna mafê perwerdeya bi zimanê zikmakî û berfirehkirina çarçoveya wê di pêşerojê de, ligel rêveberiya Şamê kar bikin.