Li Rihayê kesekî bi çekê êrişî dibistanê kir

RûpelNews - Di bûyera ku îro qewimî de, di nav de xwendekar, mamoste û polîsek jî bi giştî 16 kes birîndar bûn. Parêzgerê Rihayê Hasan Şıldak ragihand ku xwendekarê berê yê ku êrîş pêk aniye, dema ku fêm kiriye ku dê were girtin, xwe kuşt.

Parêzgarê Rihayê Hasan Şildak, derbarê êrîşa çekdarî ya ku li dibistanekê li navçeya Siwêregê pêk hat û bû sedema birîndarbûna 16 kesan, daxuyaniyek da.
Parêzgar Şildak, ragihand ku êrîşkar, di 2007an de ji dayikbûye û di dema mudaxeleya polîsan de xwe kuşt.

Parêzger Şildak li derveyî Nexweşxaneya Dewletê ya Sîweregê axivî û diyar kir ku lêpirsîna berfireh a ku piştî bûyerê hatiye destpêkirin, hem ji aliyê darazî û hem jî ji aliyê îdarî ve berdewam dike.

"Dermankirina 12 birîndaran berdewam dike"

Şildak, derbarê rewşa tenduristiyê ya kesên di bûyerê de birîndar bûne de agahî da wiha axivî:
Di êrîşa çekdarî de şazdeh kes birîndar bûn. Ji wan, çar mamoste, deh xwendekarên me, yek polîs û yek jî xebatkarê kantînê ye. Xwezî, ti mirî çênebûne. Ji ber ku rewşa tenduristiyê ya çar ji birîndarên me hinekî cidîtir e, ew ji aliyê doktorên me ve bo nexweşxaneyên navenda parêzgehê hatine veguhestin. Dermankirina 12 ji birîndarên me li nexweşxaneya me berdewam dike. Ji ber ku doktorên me rewşa yek ji xwendekarên me wekî navîn nirxand, me ew veguhezt nexweşxaneyeke bi temamî amadekirî ya li navenda parêzgehê. Dermankirina kesên din ên birîndar bi baldariyeke mezin li Nexweşxaneya Dewletê ya Sîwêregê tê kirin. Ez ji wan hemûyan re hêviya başbûneke bilez dikim.

Êrîşkar xwendekarekî berê yê dibistanê bû

Parêzgar Şildak derbarê nasname û paşxaneya perwerdehiya kesê ku êrîş pêk anî de hûrgulî parve kirin û diyar kir, "Êrîşkar xwendekarekî berê yê vê dibistanê bû. Wî tenê heta Pola 9an li vir xwendiye, piştî wê ew li Dibistana Bilind a Fêrbûna Vekirî qeyd bû. Ev kes ku di sala 2007an de ji dayik bûye, di dema bûyerê de piştî midaxeleya tîmên me yên polîsan li hundirê dibistanê ketibû quncikê. Dema ku fêm kir ku ew ê were girtin, wî bi çekê dawî li jiyana xwe anî."

"Bûyer ji her alî ve tê lêkolînkirin"

Parêzger Şildak, got ku dibistan ji ber sedemên ewlehiyê di demeke kurt de hat valakirin, tekez kir ku tevî tedbîrên ewlehiyê yên hatine girtin jî, bûyerên weha "taybet" dikarin rû bidin. Şildak diyar kir, "Dozgeriya me ya Giştî pêvajoya dadwerî lêkolîn dike, û em jî pêvajoya îdarî bi awayekî herî berfireh dinirxînin. Hemû hûrgiliyên ji destpêka bûyerê heta îro dê bên eşkerekirin. Ez sersaxiya xwe pêşkêşî gelê Sîweregê, civaka perwerdehiyê û tevahiya welêt dikim."