Li Enqereyê herî kêm 100 karkerên madenê hatin desteserkirin

RûpelNews - Karkerên "Doruk Mining"ê, dema ku li Enqereyê ji bo wergirtina mûçeyên xwe çalakî dikirin, li ber Wezareta Enerjî û Çavkaniyên Siruştî rastî destwerdana polîsan hatin.

Piştî destwerdanê, Sendîkaya Karkerên Madenê yên Serbixwe li ser hesabê xwe yê medyaya civakî daxuyaniyek da û got: "100 karkerên madenê tên desteserkirin."

Sendîka: Êrîş li dijî karkerên madenê û endamên çapemeniyê pêk hat

Sendîkayê îdia kir ku di dema destwerdanê de, nûnerê sendîkayê Başaran Aksu ji karkerên din cuda xistine nava wesayîtekê û herwiha êrîş li dijî hin endamên çapemeniyê jî hatiye kirin.

Sendîkaya Karkerên Madenê yên Serbixwe, di daxuyaniyeke ku dîmenên ji cihê bûyerê jî tê de cih digirtin de, îdia kir: "Êrîş li dijî karkerên madenê û xebatkarên çapemeniyê hate kirin."

Sendîkayê bang li rayedaran kir ku karkerên desteserkirî serbest berdin û ji raya giştî xwest ku piştgiriyê bidin çalakiyê.