Îdia: Balafirên NATOyê yên li Tirkiye çavdêriya Îranê dikin
RûpelNews - Di gel pêşbîniyên êrişa Amerîka li ser Îranê zêde dibin, tê îdiakirin ku balafirên NATOyê yên li Tirkiyeyê bi cih bûne, asîmanên Îranê dişopînin.
Li gorî raporteke ajansa medyayê ya amerîkî Bloombergê, kapasîteya çavdêriya hewayî ya NATOyê li Tirkiyeyê ji Rûsyayê veguhastiye ser Îranê.
"Kesên ku bi mijarê re agahdar in" diyar kirin ku frekansa geştên balafirên çavdêriyê yên AWACS ên ku li parêzgeha Konyayê bi cih bûne ji bo çavdêriya Îranê zêde bûye.
Amadekarî ji bo pêla koçberan
Di raportê de herwiha hat gotin ku Enqere ji bo pêleka koçberiyeke gengaz di rewşa êrîşeke li ser Îranê de xwe amade dike.
Li gorî raportê Tirkiye, avakirina kampa koçberan li ser sînorê Îranê an jî ketina nav axa Îranê da ku pêşî li derbasbûna penaberan bo Tirkiyeyê bigire dinirxîne.
Lêbelê, bijardeya ku leşkerên tirk sînor derbas bikin ji bo avakirina "herêmeke tampon" wekî gaveke pêşketîtir tê dîtin ku dê tenê di rewşa valahiyeke mezin a hêzê û kaosê de li Îranê were nirxandin.
Di raportê de navên çavkaniyên nehatin gotin û ti hûrgilî nehatine dayîn ka ew berpirsên NATOyê an yên hikûmeta Tirkiyeyê ne.
Amerîka hêz dişîne herêmê
Serokê Dewletên Yekbûyiyên Amerîkayê (DYA) Donald Trump dibêje ku ew êrîşeke li ser Îranê dinirxîne ji ber ku wê "bernameya xwe ya nukleerî û moşekên dûravêj" bernedaye, di heman demê de çavkaniyên nêzîkî Pentagonê destnîşan dikin ku artêşa DYAyê xwe ji bo destwerdaneke demdirêj a ku dibe hefteyan bidome, amade dike.
DYA bi dehan balafirên şer û du keştiyên balafirhilgir şandiye nêzîkî Îranê. Di rojên dawî de, gelek balafir gihîştine baregehên Amerîkayê yên li Rojhilata Navîn û Ewropayê.
Welatên herêmî yên wekî Tirkiye û Erebistana Siûdî bi eşkere dijberiya xwe ya li hember êrîşeke gengaz a DYAyê ya li ser Îranê diyar kirine.