Gelo dê roja Sêşemê di civîna koma CHPê de Kiliçdaroglu an jî Ozel biaxive? 

RûpelNews - Serokê Giştî yê CHPê Kemal Kiliçdaroglu dê roja Sêşemê beşdarî civîna koma partiya xwe ya li Meclîsa Mezin a Neteweyî ya Tirkiyeyê (TBMM) bibe û axaftinekê bike.

Kiliçdaroglu piştî ku vegeriya, yekem car serokatiya civîna Lijneya Rêveber a Navendî kir

Piştî civîna Lijneya Rêveber a Navendî (MYK) ya CHPê ku bi serokatiya Kiliçdaroglu pêk hat, berdevkê partiyê Muslîm Sari diyar kir ku Kiliçdaroglu dê wek serokê partiyê beşdarî civîna koman bibe û axaftinekê bike. Sari got, "Biryara me teqez e."

Kiliçdaroglu berê bersiva pirsa rojnamevanan a "Em ê we di Civîna Koma CHPê de bibînin?" dabû û gotibû "Bêguman".

Di vê navberê de, hat ragihandin ku Lijneya Disîplînê ya Bilind a CHP'ê (YDK) hin biryarên derxistina endaman ên ku di dema berê de hatibûn dayîn betal kirine, û bi vê yekê rê ji bo vegera kesayetiyên wekî Berhan Şîmşek, Bariş Yarkadaş, Gursel Tekîn û Lutfu Savaş bo partiyê hatiye vekirin.

Sari, diyar kir ku dê biryarên dûrxistinê li gorî her dozê ji nû ve bên nirxandin û derbarê her pêvajoyeke ku neheq were dîtin de dê gavên pêwîst bên avêtin.