Diplomatên amerîkî vedigerin Rojhilata Navîn
RûpelNews - Wezareta Derve ya Amerîkayê amadekariyan dike ku li balyozxane û nûnertiyên xwe yên dîplomatîk ên li Rojhilata Navîn pêvajoya normalîzasyonê bide destpêkirin, cihê ku hejmara karmendan ji ber şerê bi Îranê re hatibû kêmkirin.
Li gorî belgeyeke navxweyî ya Wezareta Derve ku ji aliyê The New York Times ve hatiye bidestxistin, vegera dîplomatan bo herêmê û sivikkirina tedbîrên awarte yên li balyozxaneyan dibe ku vê hefteyê dest pê bike.
Sê berpirsên amerîkî yên ku ji rojnameyê re axivîn jî ev amadekarî piştrast kirin.
Karmend dê li heşt welatan vegerin ser karê xwe
Li gorî belgeyê, erkên dîplomatîk ên ku tê plankirin hejmara karmendên wan dîsa were zêdekirin, li Îsraîl, Lubnan, Erebistana Siûdî, Qeter, Urdun, Oman, Iraq û Kuweytê ne.
Wezareta Derve ya DYAyê diyar kir ku rewşa ewlehiyê li nûneriyên dîplomatîk ên li seranserê cîhanê bi berdewamî tê nirxandin û ragihand ku, li gorî nirxandinên herî dawî, li hin nûneriyên li Rojhilata Navîn sererastkirinên karmendan hatine kirin.
Vegerandina karmendan dê tevî têkçûna danûstandinên di navbera DYA û Îranê de û gefên Washîngtonê yên ji bo ambargoyên aborî yên nû li dijî Tehranê jî bidome.
Di dema pevçûna Îranê de hatibûn valakirin
Rojek berî êrîşên DYA û Îsraîlê yên li ser Îranê di dawiya meha Sibatê de, ji karmendên ne bingehîn û malbatên wan ên li Balyozxaneya Amerîkayê ya li Orşelîmê re vebijarka çûna ji Îsraîlê hat pêşkêşkirin.
Di hefteyên piştî wê de, her ku Îran û hevalbendên wê yên herêmî bi dron û roketan êrîşî nûneriyên dîplomatîk ên Amerîkayê kirin bi taybetî li Erebistana Siûdî, Kuweyt û Iraqê Washingtonê ji nûneriyên xwe yên li herêmê derxistineke berfireh pêk anî.
Guftûgoyên agirbestê rawestiyane, lê dîplomat vedigerin
Guftûgoyên ji bo dirêjkirina agirbesta 60 rojî ya di navbera DYA û Îranê de, ku hefteya borî bi dawî bû, hêj encam nedane.
Lêbelê, rayedarên niha û yên berê yên Wezareta Derve vegerandina dîplomatan bo herêmê wek nîşaneke girîng a nirxandina Washingtonê ya kêmbûna rîskên ewlehiyê şîrove kirin.
Vegera karmendan her weha wek nîşanekê tê dîtin ku rêveberiya Trump li benda ji nû ve destpêkirina pevçûneke berfireh li Rojhilata Navîn di pêşerojeke nêz de nîne.