Di 10 rojan de 176 êrîş li Hewlêrê hatin kirin
RûpelNews - Parêzgarê Hewlêrê Umêd Xoşnaw, ragihand ku di 10 rojên borî de 176 mûşek û dron Hewlêrê hedef kirin, lê piraniya wan têkbir bûn.
Êrişên mûşekî û dronî
Parêzgarê Hewlêrê, îro di konfêransêkê rojnamegeriyê de got:
“Ji şemiya borî ve heta niha, Hewlêr rûbirûyî êrişên dijwar bûye ku zêdetirî 176 dron û mûşek bûne. Êrişan li gelek deverên cuda bûne, sedema zererên madî û canî.”
Xoşnaw diyar kir ku piraniya wan mûşek û dron ji aliyê sîstema parastina asmanî ve têkbir bûn.
Helwesta Herêma Kurdistanê
Li ser helwesta Herêma Kurdistanê ya li hemberî van êrişan, Umêd Xoşnaw got:
“Gel û hikûmeta Herêma Kurdistanê heta niha asta herî bilind a sebir û tehemulê nîşan daye li hemberî wan êrişên ku ji aliyê komên çekdar ên terorîst û neyasayî ve têne kirin, ku di bin desthilata hikûmeta federal de ne.”
Xoşnaw hişyarî da ku eger Bexda helwesteke ciddî nîşan nede, hikûmeta Herêmê û gelê Kurdistanê dê bi piştrastî rêkarên din bigirin ber.
Têkçûna rewşa navçeyê
Parêzgarê Hewlêrê jî behsa pirsgirêka xizmetguzariyan kir, ku pirsgirêka gazê peywendîdar e bi têkçûna rewşa navçeyê û şerê navbera Amerîka, Îsraîl û Îranê, ku bûye sedema rawestandina hilberîna li qada gazê ya Kormorê.
Xoşnaw diyar kir ku ev bandor rast li ser stasyonên karebayê û dabînkirina gaza malan kiriye, bûye sedema qeyranê û bilindbûna bihayên wê.