Artêşa Îsraîlê ket gundeke Sûriyê

Li gorî raporeke ajansa nûçeyan a fermî ya Sûriyê SANA, hêzeke leşkerî ya Îsraîlê ku ji şeş wesayîtên Humvee pêk dihat, ket herêma Tel El-Ahmar a li rojavayê welêt, paşê ber bi gundê Eyn Zewan ve pêşve çû, bi ser mala gundiyekî de girt û lêgerîn kir.

Hat destnîşankirin ku leşkerên Îsraîlê li herêmê bi cihbûna xwe berdewam dikin û sedema êrîşê hêj nehatiye diyarkirin.

Di raporê de hat gotin ku roja pêncşemê, hêzeke Îsraîlî ku ji heft wesayîtên leşkerî pêk dihat, li ser rêya El-Kesarat a li bakurê Quneytirayê xaleke kontrolê ya demkî danî û di wesayîtên ku derbas dibûn lêgerîn kiriye û bi vî awayî tedbîrên ewlehiyê li herêmê zêde kirine.

Hebûna Îsraîlê li Sûriyê

Îsraîl piştî hilweşana rejîma Esed derbasî herêmên başûrê Sûriyê bû.

Îsraîlê yekem car aliyê Sûriyê herêma tamponê li Bilindahiyên Golanê desteser kir û heta 20 kîlometreyan nêzîkî Şamê bû.

Artêşa Îsraîlê herwiha li ser beşên cuda yên Sûriyê êrîşên hewayî pêk anîn û baregehên leşkerî yên herî stratejîk û hêza deryayî ya welêt ji nav kirin.