Amerîkayê jinek ji bo nûnertiya taybet a Sûriyê erkdar kir

PeyamaKurd – Wezareta Derve ya Amerîkayê jina bi navê Aimee Cutrona wek nûnera taybet a demkî bo karûbarên Sûriyê erkdar kir.

Wezareta Derve ya Amerîkayê 18ê Sibatê bi daxuyaniyekê eşkere kiriye ku Aimee Cutrona wek nûnera taybet a Sûriyê ya demkî hatiye erkdarkirin.

Hêjayî bibîrxistinê ye, James Jeffrey demeke dirêj nûnerê taybet ê Sûriyê bû ku beriya hatina rêveberiya Joe Biden xanenişîn bûbû.

Cutrona sala 2019an gerînendeya Nivîsgeha Karûbarên Rojhilatê Deryayê Spî û cîgira serokê şanda Behreynê bû.

Wezareta Amerîkî diyar kiriye ku Aimee Cutrona sala 1999an li paytexta Etiyopyayê dest bi erka xwe kiriye û ji wê demê ve wek berpirseke siyasî li balyozxaneyên Amerîka yên li Salvador, Qeter û Misirê kar kiriye.

Hat zanîn ku Aimee Cutrona di gelek xebatên xurtkirina dozên jinan û têkoşîna li dijî bazirganiya mirovan de jî cih girtiye.