AK Partiyê ji bo pêşniyarên Bahçelî yên derbarê Ocalan de peyama piştgiriyê da
Berpirsên AK Partiyê, ku destnîşan kirin ku pêşniyarên Serokê MHPê Devlet Bahçelî yên derbarê pêvajoya aştiyê de "biqîmet" bûn, diyar kirin ku dibe ku mekanîzmayeke nû ya şopandin û nirxandinê di nav Parlemntoya Tirkiyeyê (TBMM) de were damezrandin.
RûpelNews - Li gorî agahiyên ji hatine bidestxistin, avakirina saziyeke mîna "Komîteya Çavdêrî û Nirxandinê", ku ji aliyê Serokê Parlementoyê Numan Kurtulmuş ve were koordînekirin, dikare bikeve rojeva ji bo misogerkirina çavdêriya mayînde ya pêvajoya bêçekkirinê.
"Pêvajoya bêçekkirinê dikare were şopandin"
Li gorî nûçeya T24ês berpirsên AK Partiyê diyar kirin ku piştî ku di warê bêçekkirinê de pêşketinek çêbibe, rêziknameyên îdarî û yasayî dikarin bên nirxandin. Berpirsan destnîşan kirin ku pêvajo dikare di bin sîwana Parlementiyê de bi rêya saziyeke ku nûnerên partiyên siyasî yên cuda tê de cih digirin, were şopandin.
Di daxuyaniyan de hat destnîşankirin ku mekanîzmayeke ku saziyên têkildar karibin di navberên birêkûpêk de agahiyan bidin Serokatiya Parlementoyê jî di rojevê de ye.
Amadekariyên derbarê Ocalan de tên gotûbêjkirin
Çavkaniyên AK Partiyê diyar kirin ku, wekî berê jî, hin amadekariyên derbarê şert û mercên girtîgehê yên Abdullah Ocalan de dikarin bên rojevê. Berpirsan diyar kirin ku pêşniyarên derbarê şiyana Ocalan a ji bo hevdîtina bi beşên cuda yên civakê re jî dikarin bên nîqaşkirin.
Di vê çarçoveyê de, hat ragihandin ku hevdîtinên bi nûnerên civaka sivîl, akademîsyen, rojnamevan û kesayetiyên siyasî re wek tedbîrên potansiyel ji bo piştgiriya pêvajoyê tên nirxandin.
"Dibe ku pêvajo dem bigire"
Berpirsên AK Partiyê tekez kirin ku di rewşên bi vî rengî de, pêvajoyên wiha bi salan dom kirine û diyar kirin ku armanc pêvajoyeke çekdanînê ya domdar û verastkirî ye.
Di vê navberê de, derbarê îdiayên ku dibêjin Abdullah Ocalan li Îmraliyê bi hin serokên rêxistinan re hevdîtin kiriye, hat ragihandin ku ti hevdîtineke rûbirû çênebûye û pêwendî bi rêya name, peyam û vîdyoyan pêk hatiye.
