Welatên Erebî û Îslamî, Îran şermezar kirin û rênimayên nû ragihandin
Wezîrên derve yên hin welatên Erebî û Îslamî êrîşên Îranê yên li herêmê gotûbêj kirin, Îran şermezar kirin û dan zanîn ku wan tedbîrên hevpar ên li ser bingeha hiqûqa navneteweyî ragihandine.
RûpelNews - Wezîrên derve yên welatên Erebî û Îslamî di civîneke şêwirînê de ku di 18ê Adara 2026an de li Riyadê hat lidarxistin, êrîşên Îranê yên li herêmê gotûbêj kirin, Îran şermezar kirin û tedbîrên hevpar ên li ser bingeha hiqûqa navneteweyî ragihandin. Wezîrên Tirkiye, Azerbaycan, Behreyn, Misir, Urdun, Kuweyt, Lîbnan, Pakistan, Qeter, Erebistana Siûdî, Sûriye û Îmaratê beşdarî civînê bûn.
Xalên sereke yên daxuyaniya hevpar wiha ne:
Redkirina êrîşên Îranê
Wezîran êrîşên balîstîk û dronan ên Îranê yên ku welatên, Urdun, Azerbaycan û Tirkiyeyê kiribûn armanc, şermezar kirin û tekez kirin ku ev êrîşên ku deverên niştecihbûnê û binesaziya sivîl kirine armanc, di bin ti şert û mercî de rewa nayên dîtin. Hat destnîşankirin ku mafê parastina xwe yê dewletan li gorî Xala 51an a Peymana Neteweyên Yekbûyî heye.
Banga ji bo bidawîkirina êrîşan
Wezîran diyar kirin ku divê Îran êrîşên xwe rawestîne, rêzê li qanûna navneteweyî û qanûna mirovî bigire, û dîplomasiyê pêş bixe da ku aramiyê li herêmê misoger bike.
Pêşeroja têkiliyên bi Îranê re
Hat ragihandin ku têkilî dê bi rêzgirtina li serweriya dewletan, ne-destwerdan di karûbarên navxweyî de, û ne-bikaranîna hêza leşkerî bi awayekî ku herêmê bixe xeterê ve girêdayî bin.
Cîbicîkirina Biryara Konseya Ewlekariyê ya Neteweyên Yekbûyî
Hat ragihandin ku divê Îran li gorî Biryara Konseya Ewlekariyê ya NYê ya 2817 (2026) êrîşên xwe rawestîne, dawî li kiryarên provokatîf ên li dijî welatên cîran bîne, û dev ji çalakiyên piştgirîkirin, fînansekirin an çekdarkirina milîsên li welatên Erebî berde. Her wiha hat xwestin ku Îran xwe ji zerardayîna ewlehiya deryayî ya navneteweyî li Tengava Hurmûz û Bab el-Mandeb dûr bigire.
Ewlehiya Lubnanê
Wezîran diyar kirin ku ew piştgiriya ewlehî û yekparçebûna axa Lubnanê dikin, biryara hikûmeta Lubnanê ya ji bo parastina yekdestiya dewletê ya li ser çekan pesend dikin, û polîtîkayên berfirehker ên Îsraîlê li herêmê şermezar dikin.
Berdewamiya şêwir û hevrêziyê
Wezîran piştrast kirin ku ew ê geşedanan bişopînin, şêwiran bidomînin, û helwesteke hevpar bipejirînin da ku li dijî êrîşên Îranê tedbîrên rewa ji bo parastina ewlehî, aramî û serweriyê bigirin.
