"Wê di demek nêzîk de talîmatên civîna yekem bê dayîn"

PeyamaKurd – Berdevkê Serokatiya Herêma Kurdistanê Dilşad Şehab diyar kir ku Serokê Herêma Kurdistanê Nêçîrvan Barzanî dê ji bo yekemîn civîna dewra 6an a Parlamentoya Kurdistanê talîmatan bide.

Dilşad Şehab di daxuyaniya xwe de eşkere kir ku, Komîsyona Bilind a Serbixwe ya Hilbijartinan bi nivîseke fermî ji wan re ragihandiye ku encamên hilbijartinên Parlamentoya Kurdistanê pesend kirine.

Dilşad Şehab amaje bi prosedurên piştî pesendkirina encaman jî kir û ragihand, li gorî yasaya Serokatiya Herêma Kurdistanê, Nêçîrvan Barzanî wê di demeke nêzîk de ji bo yekemîn civîna dewra 6ê ya Parlamentoya Kurdistanê rênimayiyên xwe bide.

Komîsyona Bilind a Serbixwe ya Hilbijartinan a Iraqê encamên hilbijartinên Parlamentoya Kurdistanê pesend kir û daxuyaniya nivîskî ji Serokatiya Herêma Kurdistanê re şand.

Berpirsê Hilbijartinên Parlamentoya Kurdistanê li Komîsyona Bilind a Serbixwe ya Hilbijartinan a Iraqê Neberd Omer di daxuyaniya xwe ya doh de ragihand, îro Yekşemê 24.11.2024, Encûmena Komîsyaran a Komîsyona Hilbijartinan a Iraqê encamên hilbijartinên dewra 6an a Parlamentoya Kurdistanê pesend kir.

Neberd Omer diyar kir ku encamên pesendkirî wê bi nameyeke fermî pêşkêşî Serokatiya Herêma Kurdistanê bikin.