Serok Barzanî ji McGurk xwest Kurdên Sûriyê…

PeyamaKurd - Serok Mesûd Barzanî îro 17ê Kanûnê  li Pîrmamê bi Nûnerê Taybet ê Serokê Amerîkayê Brett McGurk û şanda ligel wî re civiya. Hat ragihandin, di civînê de Serok Barzanî digel şîret û pêşniyarên bo rewşa Kurdên Sûriyê, ji şanda Amerîkî daxwaza çareserkirina arîşeyan kir.

Malpera fermî ya Serok Barzanî ragihand ku di civînê de behsa rewşa Sûriyê û pêşhatên dawî hatiye kirin û şanda mêvan jî behsa rewşa dawî ya şerê dijî DAIŞê li Sûriyê kiriye û di wê derbarê de Serok Barzanî agahdar kiriye.

Herwiha hat diyarkirin ku Serok Barzanî di hevdîtinê de, fikarên xwe yên li hember rewşa gelê Kurd li Sûriyê anî ziman û digel şîret û pêşniyarên xwe daxwaz kir ku ji bo nehîştina metirsiyên li ser gelê Kurd û çareserkirina arîşeyan hewil bidin.

Di beşeke din a hevdîtinê de Barzanî û şanda Amerîkî behsa rewşa Iraqê, pêkanîna hikûmeta nû ya Iraqê û pêwendiyên Hewlêr û Bexdayê kirin. Li gor daxuyaniyê behsa serdana Barzanî ya Bexdayê û serdana Wezîrê Enerjiyê yê Amerîka bo Herêma Kurdistanê jî di hevdîtinê de hat kirin.