Sekreterê Gistî yê Neteweyên Yekbûyî Guterres agirbest ragihand

PeyamaKurd – Neteweyên Yekbûyî (NY) diyar kir ku ew amade ne ji bo bicihanîna peymana agirbesta di navbera Îsraîl û Hamasê ya li Xezzeyê de alîkariyê bikin û banga avakirina çareseriya du dewletî kir ku tê de Îsraîl û Filistîn li kêleka hev bijîn.

Sekreterê Giştî yê Neteweyên Yekbûyî Antonio Guterres diyar kir ku Neteweyên Yekbûyî amade ye ku piştgiriyê bide agirbesta li Şerîda Xezzeyê û şandina alîkariyên mirovî ji bo herêmê zêde bike.

Guterres di konfêranseke rojnamevanî de got, "NY amade ye ku piştgiriyê bide cîbicîkirina peymanê û gihandina alîkariyên mirovî yên domdar ji bo bêhejmar Filistîniyên ku êşê dikişînin."

Guterres spasiya hewldanên Misir, Qeter û Amerîkayê yên ji bo lihevkirinê kir û got, "Ez bang li hemû aliyan dikim ku erkên xwe yên ji bo pêkanîna tam a peymanê bi cih bînin."

"Ev peyman gava yekem a girîng e"

Guterres got ku niha pêşaniya sereke sivikkirina êşên tirsnak ên ku ji ber vê pevçûnê derketine ye û destnîşan kir ku NY amade ye ku tevkariyê li cîbicîkirina peymanê bike û alîkariyên mirovî yên ji bo Filistîniyan zêde bike.

Guterres destnîşan kir ku girîng e ku agirbest astengiyên li pêşiya alîkariyên mirovî yên li Xezzeyê rake û wiha got, "Ev peyman gaveke ewil a krîtîk e. Lê belê divê em xebatên xwe li ser armancên berfireh bidomînin."

Guterres bal kişand ser girîngiya yekitiya li herêmên Filistînê yên îşxalkirî û destnîşan kir ku rêvebiriya yekgirtî ya Filistînê ji bo pêşî li vê yekê ye.

'Ez banga avakirina çareseriya du dewletî dikim'

Sekreterê Giştî yê Neteweyên Yekbûyî Guterres got, "Ez bang li alî û hevkaran dikim ku vê derfetê ji bo avakirina pêşerojeke baştir ji bo Filistîn, Îsraîl û herêmê, ji bo bidawîkirina dagirkeriyê û avakirina çareseriya du dewletan ku tê de Îsraîl û Filistîn li kêleka hev li gorî hiqûqa navneteweyî bijîn, bi kar bînin."

Guterres destnîşan kir ku daxwazên her du gelan tenê bi çareseriya du dewletan pêk tên û destnîşan kir ku biryar û peymanên heyî yên Neteweyên Yekbûyî di vî warî de rêbertiya xwe dikin.

Guterres sersaxî ji sivîlan, personelên Neteweyên Yekbûyî û xebatkarên alîkariyê yên însanî yên ku jiyana xwe ji dest dane re xwest û got ku NY ji bo aştî, îstiqrar û pêşerojeke hê hêvîdar a gelên Filistîn, Îsraîl û herêmê pêgir e.