Şaredarekî din ji CHPê îstifa kir
Di nav aloziyên berdewam ên li CHPê de piştî doza kongreya partiyê, Şaredarê Navçeya Sebenê ya Boluyê Uygar Oturakdaş, ji partiya xwe îstifa kir. Her wiha derket holê ku pênc endamên meclîsa şaredariyê yên CHPê jî li gel Oturakdaş ji partiyê veqetiyan.
RûpelNews - Piştî ku Kemal Kilicdaroglu bi biryara dadgehê ji nû ve wek serokê CHPê hate destnîşankirin, îstifayên di nav partiyê de berdewam dikin.
Li gorî agahiyan, Uygar Oturakdaş, şaredarê navçeya Sebenê yê CHPê li Boluyê, ji partiyê îstifa kir.
Ji bilî Oturakdaş, her wiha hatiye ragihandin ku pênc endamên meclîsa şaredariyê yên ku wek endamên CHP'ê hatibûn hilbijartin jî ji partiyê derketine.
Hêj ti daxuyanî nehatiye dayîn
Şaredarê Sebenê Uygar Oturakdaş, derbarê biryara xwe ya îstifayê de hêj ti daxuyaniyeke giştî nedaye.
Derbarê sedemên îstifayan de ti agahiyeke fermî nehatiye parvekirin.
Di hilbijartinên herêmî de ji sedî 52.71ê dengan bi dest xistibû
Uygar Oturakdaş di Hilbijartinên Giştî yên Herêmî yên 31ê Adara 2024an de wek namzedê CHPê bi ji sedî 52.71ê dengan wek Şaredarê Sebenê hatibû hilbijartin.
Di heman hilbijartinê de, namzedê AK Partiyê Fatih Kiyak, bi ji sedî 42.39ê dengan di rêza duyemîn de cih girt.
