Qurbaniyên komkujiya Pirsûsê li Stenbolê hatin bîranîn

RûpelNews - Bîranîn li Kolana Halitağa ya navçeya Kadikoy a Stenbolê pêk hat; ev bîranîn ji bo wan 33 kesan bû ku li ser banga Federasyona Komeleyên Ciwanên Sosyalîst (SGDF) ber bi Kobaniyê ve ketibûn rê û di 20ê Tîrmeha 2015an de li Pirsûsê di êrîşa xwekujî ya DAIŞê de hatibûn kuştin.

Li gorî agahîyên rojnameger Metin Yoksu ku ji Rûpelnewsê re şand , nûnerên gelek partiyên siyasî, saziyên sivîl, sendîka, platform û rêxistinên ciwanan beşdarî çalakiyê bûn. Beşdaran wêneyên kesên ku di komkujiyê de jiyana xwe ji dest dabûn hildan û pankarteke bi nivîsa "Bila dilên me ji bo dadmendiyê lê bidin" vekirin. Wan gelek caran dirûşmên wekî "Ji bo Pirsûsê dadmendî, ji bo her kesî dadmendî", "Berpirsiyarên Pirsûsê wê hesab bidin" û "Amed, Pirsûs, Enqere; em ê hesab bipirsin" qîriyan.

"Em ê jî wekî wan bi îrade û xurt bin"

Bîranîn bi rêzgirtinê dest pê kir û piştre Bayram Boyraz, hevjînê Nazegül Boyraz a ku di komkujiyê de jiyana xwe ji dest dabû, axaftinek kir. Boyraz bal kişand ser wê yekê ku ciwan beriya bigihîjin Pirsûsê rastî gelek kontrolan hatibûn û pirsî: "Heke ewqas kontrol hatibin kirin, çawa bû ku bombeyê ferq nekirin?" Boyraz anî ziman ku ew nêzîkî 11 salan e ji bo dadmendiyê têdikoşin û got: "Em ne xemgîn in û em ê xemgîn jî nebin. Ew bi ken çûn. Em ê jî wekî wan bi îrade û xurt bin." Ali Sadet, bavê Ezgi Sadet a ku di êrîşê de hatibû kuştin, wiha got: "Em daxwaza dadmendiyê dikin; dadmendî ji bo her kesî ye. Heke berpirsiyarên Roboskî û Sivasê hesab bidan, bûyera Pirsûsê nediqewimî. Heke berpirsiyarên Pirsûsê hesab bidan, bûyera Enqereyê nediqewimî. Em ji bo dadmendiyê li vir in." Parlamentera DEM Partiyê ya Stenbolê Kezban Konukçu jî bal kişand ser wê yekê ku di komkujiyên Pirsûs û Enqereyê de ciwan û hêzên demokrasiyê hatine hedefgirtin û got: "Wan difikirî ku eger daxwaza wekheviyê xurtir bibe, dê dawiya wan were. Lewma wan ev komkujî pêk anîn."

"Divê em hemû barê li ser milê gelê Kurd nehêlin"

Konukçu bal kişand ser girîngiya têkoşîna hevbeş a li dijî faşîzmê û got, "Divê em bi girtina destê aştiyê yê ku ji hêla gelê kurd ve hatiye dirêjkirin têkoşînê berfireh bikin. Divê em hemû barê li ser milê gelê Kurd nehêlin. Em dikarin bi naskirina pêwîstiya aştiyê bîranîna Suruçê bi rûmet bikin."

"Ew nûnerên wekheviyê li van axan bûn"

Hevseroka SGDF Berfin Polat destnîşan kir ku kesên ku jiyana xwe ji dest dane parêzvanên şoreşa Rojava bûn û got, "Ew nûnerên wekheviyê li van axan bûn. Bi hêviya ku ji Gezî û Rojava girtin, ew ji bo şoreşa ku li kêleka wê pêk tê, derketin pêş." Polat destnîşan kir ku niha hewldanên guhertina navê Kobanî hene û tekez kir ku divê li dijî vê yekê derkevin.

Polat wiha domand, "Ev komkujî lêgerîna edaletê ya gelê kurd, ciwanan û jinan hedef girt. Wan dixwest xewnên me yên li wî baxçeyî tune bikin. Lê em ji wê komkujîyê sax man. Ew xewn dê di berxwedana Tirkiye û Kurdistanê de bijîn."

Piştî bîranînê, ji Kolana Halitagayê heta Operaya Sureyya meşek hate lidarxistin. Li wir, dema ku navên kesên ku jiyana xwe ji dest dane yek bi yek hatin xwendin, beşdaran piştî her navî dirûşmeya "Ew dijîn" qîr kirin.