Pêşnûmayasaya çarçoveyê pêşkêşî Parlamentoyê hat kirin

RûpelNews - Serokê Koma AK Partiyê Abdullah Guler ragihand ku Pêşnûmeyasaya li ser Xurtkirina Hevgirtina Neteweyî û Yekbûna Civakî ji Serokatiya Parlamentoya Tirkiyeyê re hatiye pêşkêşkirin.

Guler diyar kir ku li ser pêşnûmeyasayê îmzeya nêzîkî 360 parlamenteran heye.

Ev pêşnûmeyasa, ku wekî beşek ji pêvajoya tasfiye û teslîmkirina çekan a PKKê hatiye amadekirin, armanc dike ku çarçoveya yasayî ya pêvajoyê deynê.

Tê payîn ku pêşnûmeyasa di rojên pêş de li komîteyên pêwendîdar ên Parlamentoya Tirkiyeyê were nîqaşkirin û piştî wê jî tê payîn ku bikeve rojeva Civata Giştî.

Pêşnûmayasa çi xalan dihewîne?

Pêşnûmayasaya 'Xurtkirina Hevgirtina Neteweyî û Yekîtiya Civakî', ku ji Serokatiya Parlamentoya Tirkiyeyê re hatiye pêşkêşkirin, bi giştî ji 12 madeyan pêk tê, ku xalên cîbicîkirinê jî di nav de ne.

Kesên ku dixwazin ji bendên vê pêşnûmayasayê, ya ku bi awayekî demkî hatiye amadekirin, sûd werbigirin, dê bikaribin di nav şeş mehan de ji roja ku yasa dikeve meriyetê, serlêdanên takekesî pêşkêş bikin. Piştî ku ev dem bi dawî bibe, dê ti serlêdanên nû neyên qebûlkirin; dirêjkirina dema serlêdanê tenê bi rêya qanûndanîneke nû mimkun e.

Li gorî pêşnûmayasayê, endamên rêxistinan ên ku sê sal in tevlî tu sûcekî cezayî nebûne, dê destûr hebe ku tevlî çalakiyên siyasî bibin. Berevajî vê, kesên ku berî sala 2005an cezayê hepsa heta hetayê yê giran wergirtine, û her wiha kesên ku bi sûcên ku cezayê hepsa heta hetayê yê giran li pey wan tê mehkûm bûne, ji çarçoveya rêziknameyê hatine derxistin.