PDK-Sê, ji bo Efrînê banga alîkariyê kir

PeyamaKurd- Di erdheja ku bi lerza 7,7 û 7,6 ya li Mereşê pêk hat û bandora xwe li rojava jî kir de Rêxistina Efrînê ya girêdayî Partiya Demokrat a Kurdistanê ya Suriyeyê (PDK-S) banga alîkariyê ji rêxistinên mirovî yên navneteweyî û herêmî kir.

Di agahiyên hatin ragihandin de hat diyarkirin ku ji ber erdhejê li gelek navçe, bajarok û gundên Efrînê yên Rojava, avahî û xanî hilweşiyane û heta niha bi sedan kesan jiyanên xwe ji dest dane û gelek kes jî di bin kavilan de li benda rizgarkirinê ne.

Di daxuyaniya ku ji aliyê rayedarên Rêxistina Efrînê ya girêdayî Partiya Demokrat a Kurdistanê Suriyeyê ve hat dayîn de banga alîkariyê ji rêxistinên mirovî yên navdewletî û herêmî hat kirin.

Bi rêya daxuyaniyê hat ragihandin ku gelek kes di bin xirbeyan de mane, hat gotin ku li herêma Efrînê û bi taybetî li bajarokê Cindirêsê, karesateke mirovî rû daye. 

Her wiha bi vê daxuyaniyê re bang li endam û alîgirên PDK-S jî hat kirin ku ji bo mexdûrên erdhejê seferber bibin.

Li aliyê din ve jî Rêxistina Berevaniya Sivîl a Sûriyeyê ragihand ku di erdhejê de tenê li bajarokê Cindirêsê yê ser bi herêma Efrînê de zêdetirî 300 kesan canên xwe ji dest dane.