Li Stenbolê wesayîta xwendekara qeza kir: 13 kes birîndar bûn
Li navçeya Kuçukçekmece ya Stenbolê li ser rêya kêlekê ya Floryayê, li ser otobana E-5ê wesayîta xwendekara qeza kir û di encamê de 13 kes birîndar bûn u di wan de 5 kes giranin.
RûpelNews - Qeza derdora saet 16:30an de li ser rêya kêlekê ya Floryayê li taxa Beşyol a navçeya Kuçukçekmece pêk hat. Xwendekarên qurseke havînê ya li Beylikduzuyê ji bo geştekê hatibûn birin. Di dema vegerê de, ajokar M.K. kontrola wesayîtê winda kir; wesayît pêşî li baryeran û piştre jî li tabelaya rênîşander a li ser dabeşbûna rê ket.
Ji ber hêza lêdanê wesayît derket ser baryeran; welatiyên li derdorê ji bo alîkariyê bi lez ber bi cihê bûyerê ve çûn. Piştî agahdarkirinê, gelek tîmên polîs û tenduristiyê sewqî cihê bûyerê hatin kirin.
Di qezayê de sêzdeh zarokên di nav wesayîtê de birîndar bûn. Hat ragihandin ku rewşa pênc ji birîndaran giran e; zarok piştî destwerdana ewil a li cihê bûyerê, bi ambulansan bo nexweşxaneyên nêzîk hatin veguhestin. Ajokar M.K. ji aliyê tîmên polîsan ve hat desteserkirin.
Ji ber qezayê, trafîka li ser otobana E-5 demekê bi awayekî kontrolkirî hat birêvebirin û di encamê de rêzên dirêj ên wesayîtan çêbûn. Piştî ku wesayîta ku bi temamî wêran bûbû bi wesayîteke kişandinê (çekici) ji cihê bûyerê hat rakirin, trafîk vegeriya rewşa xwe ya asayî.
