Derbarê Imamoglu de îdianameyek nû hat amadekirin
Serdozgeriya Buyukçekmeceyê, bi tohmetên "xirabî di erkê de" di dema wî ya şaredariya Beylikduzuyê de îdianameyek li dijî Ekrem Imamoglu amadekir.
RûpelNews - Serdozgeriya Buyukçekmeceyê ya Stenbolê li dijî 12 kesan, di nav de namzedê serokatiyê yê CHPê Ekrem Imamoglu, bi tohmetên " xirabî di erkê de" îdianameyek amade kir.
Îdianame ji Dadgeha Cezayê ya Yekem a Buyukçekmeceyê re hatiye şandin.
Civata dozgeriyê destnîşan kir ku du îhaleyên cuda, ku her yek bi nirxê 65,600 TL bû, yên ku ji aliyê Rêveberiya Karûbarên Ciwan û Werzîşê ya Şaredariya Beylikduzu ve di 25ê Kanûna 2018an û 15ê Çileya 2019an de hatine kirin, "dibe ku prensîbên şefafî, pêşbazî û bikaranîna bibandor a çavkaniyan binpê kiribin."
Her wiha hat îdiakirin ku kirîna "200 amûrên bîrê yên derve" bi nirxê 83,500 TL di 20ê Gulana 2019an de li ser bihayên bazarê hatiye kirin û zirar gihandiye gel.
Di îdianameyê de her wiha hat gotin ku otomobîleke Mercedes Vito ji aliyê şîrketa Imamoglu ve ji bo xizmetên şaredariyê hatibû veqetandin û lêçûnên wê yên temîrat û sotemeniyê ji budceya şaredariyê dihatin dayîn. Hatibû destnîşankirin ku, li gorî qanûna têkildar, "lêçûnên otomobîlên taybet nikarin ji budceya giştî ve bên dayîn" û ku ev kiryar bûye sedema zirareke giştî ya bi qasî 122,305 TL.
Ekrem Imamoglu, ku niha di Zindana Sîlîvriyê de ye, di navbera salên 2014 û 2019an de şaredariya Beylikduzuyê kir.
