Li Amedê mînîbus û otomobîlê li hev dan
Li gorî agahiyên destpêkê, di encama lihevketina mînîbuseke rêwiyan û otomobîlekê de li navçeya Yenişehir a Amedê, çend kes birîndar bûn.
RûpelNews - Qeza li nêzîkî Mala Mamosteyan ya li ser Cadeya Elezîzê, li navçeya navendî ya Yenişehirê pêk hat.
Li gorî agahiyan, mînîbusa rêwiyan û otomobîl ku nasname û plaqeyên ajokarên wan hêj nehatine diyarkirin li hev dan. Piştî ku welatiyên li derdorê bûyer ragihandin, tîmên tenduristiyê û polîsan sewqî cihê bûyerê hatin kirin.
Kesên birîndar rakirin nexweşxaneyê
Li gorî nirxandinên destpêkê, di qezayê de çend kes birîndar bûn. Hat ragihandin ku piştî destwerdana tîmên tenduristiyê ya li cihê bûyerê, birîndar rakirin nexweşxaneyê. Hêj derbarê hejmara birîndaran an rewşa wan a tenduristiyê de daxuyaniyeke fermî nehatiye dayîn.
Ji ber qezayê, herikîna trafîkê ya li ser Cadeya Elezîzê demekê hat astengkirin. Derbarê sedema qezayê de lêkolîn hat destpêkirin û xebatên tîmên polîsan li cihê bûyerê berdewam dikin.
