Ji ber şer aboriya Îranê 270 milyar dolarî zirar dît
Li Îranê ligel zêdebûna enflasyona salane ku li ser ji sedî 80ê ye, di tîrmehê de bilindbûna bihayên xwarinê jî nêzîkî ji sedî 130 bû. Ji ber şer zirara aboriya li vî welatî gihiştiye 270 milyar dolarî.
RûpelNews - Aboriya Îranê piştî şerê ligel Amerîka û Îsraîlê ziyaneke mezin dît. Enflasyona li welêt her diçe zêdetir dibe. Digel ku enflasyona xerîdar a salane li Îranê %87.9 e, bilindbûna salane ya bihayên xwarinê nêzîkî %130 e.
Supermarket û firoşkarên din jî dest pê kirine ku xwarin û kelûpelên bingehîn ên xerîdar bi awayekî teqsît bifroşin. Li hin firoşgehan, dravdanên ji bo pakêtên kelûpelên bingehîn dikarin li ser 4 heta 8 teqsîtan bên dabeşkirin.
Heta beriya şer jî, aboriya Îranê bi sanciyon, enflasyona bilind, kêmasiya diravê biyanî û pirsgirêkên strukturel re rûbirû bû. Lêbelê, mezinbûna şer û zêdebûna zextê li ser bazirganiya derve, ev pirsgirêkên aborî girantir kirine.
Li gorî texmînên ku berê ji aliyê hikûmeta Îranê ve hatibûn weşandin, zirara ku ji ber şer gihîştiye aboriya welêt, digihîje nêzîkî 270 milyar dolarî.
