Iraqiyan li dijî hejmûna Îranê deng da

PeyamaKurd - Welatiyên Iraqê di hilbijartinê de diyar kirin ku ew li dijî bandora Îranê ne û dixwazin serbixwe bibin.

Li encamên 12 parêzgahên Iraqê ku Komîsyona Hilbijartinê ragihandin, Hereketa Saîrûn ya bi pêşengiya Muqteda Sedr yekemîn e û teqrîben 60 parlamenterî derdixîne.

Li gor vê encamê Sedr halê hazir jimara kursiyên xwe du qatî kiriye û ji 32an derxistiye 60î.

Ev encam wê yekê nîşan didin ku dengdêrên Iraqê partiyên yekser bi Îranê ve girêdayî ne napejirînin û dixwazin ji bin tesîra derve derkevin.

Muqteda Sedr bi daxuyaniyên li dijî bandora Îranê li Iraqê tê zanîn û çend caran ragihandiye ku divê Îran dest ji Iraqê bikişîne.

Sedr bi vî aliyê xwe fikra Şîîtiya Erebî li dijî Şîîtiya Îranê temsîl dike.