Iraq: Bi êrîşeke moşekî balafireke leşkerî li Bexdayê hat rûxandin
Wezareta Bergiriyê ya Iraqê ragihand ku bi rêya çend moşekên "Grad" êrîşî bingeheke asmanî li paytext Bexdayê hatiye kirin û di encamê de balafireke veguhastinê ya leşkerî ya Hêza Asmanî ya Iraqê hatiye rûxandin.
RûpelNews - Wezaretê di daxuyaniyekê de diyar kir ku bingeha asmanî ya "Şehîd Mihemed Ela", saet di 01:55ê şevê de bi moşekên Grad (122 mm) hat armancgirtin. Li gorî zanyariyan, moşek ji derdora bajarê Bexdayê hatine avêtin.
Zirarên maddî û rûxandina balafira (Antonov-132)
Di daxuyaniyê de hat piştrastkirin ku di encama êrîşê de balafireke leşkerî ya cureyê (Antonov-132) bi temamî hatiye rûxandin, lê belê ti zirara canî nehatiye qeydkirin. Wezaretê da zanîn ku aliyên pêwendîdar yekser dest bi lêkolînan kirine da ku asta zirarê binirxînin û çavkaniya avêtina moşekan tespît bikin da ku sûcdaran bigrin.
Gefên li dijî êrîşkeran
Wezareta Bergiriyê ev êrîş wek "karekî sûcdar û tirsonek" bi nav kir ku armanca wê lawazkirina hêza bergiriyê ya welat û lêdana saziyên leşkerî yên serwer e. Hat destnîşankirin ku hêzên ewlehiyê dê wek mertalê parastina welat bimînin û destdirêjî li ser çek, amûr û balafirên şer, karekî xerabker e ku ewlehiya neteweyî ya Iraqê dixe metirsiyê.
Wezareta Bergiriyê daxuyaniya xwe bi vî rengî bi dawî kir: "Wezaret dê di şopandina kesên ku hewl didin ewlehî û serweriya Iraqê têk bibin de sistiyê neke." Her wiha hat gotin ku dê bersiva wan di çarçoveya qanûnê de ji bo parastina aramiya welat tund be, û ev celeb çalakî nabin asteng li pêşiya erkên hêzên çekdar û amadebaşiya wan.
