Îranê li dijî baregehên Amerîkayê êrişên tolhildana berfireh da destpêkirin
Îranê ragihand ku wek bersivdayîna êrîşên berdewam ên Dewletên Yekbûyî yên Amerîkayê (DYA) wê baregehên Amerîkayê yên li Behreyn, Urdun û Kuweytê bi mûşek û balafirên bêmirov kiriye armanc.
RûpelNews - Li gorî nûçeyên di çapemeniya Îranê de, artêşa Îranê bi moşek û firokeyên bêmirov êrîşên tolhildanê li dijî armancên ku wekî 'baregehên dijmin' bi nav kirine, li herêmê pêk anî.
Di daxuyaniyeke ku ji aliyê Sûpaya Pasdaranê ve hat weşandin de hat diyarkir ku binkeyên leşkerî yên DYAyê yên li Behreyn, Urdun û Kuweytê hatine armancgirtin.
Li gorî daxuyaniyê, navendên lênêrîn û nûjenkirina helîkopteran ên li Bingeha Hewayî ya Şêx Îsa ya li Behreynê, hangara ku balafira şerê elektronîk a P-8 tê de ye, û navenda fermandahî û kontrolê ya balafirên bêmirov hatine lêdan. Hat îdiakirin ku depoyên mûşekan û binkeyên sotemeniyê yên li Bingeha Hewayî ya Mîr Hesen a li Urdunê, her wiha depoyên sotemeniyê yên li Bingeha Elî El-Selem a li Kuweytê, sîstema parastina hewayî ya Patriot û sîstema radara stratejîk a FPS a li Bingeha Ehmed el-Caber jî hatine armancgirtin.
Pasdarên Şoreşê ragihandin ku êrîşên tolhildanê dê berdewam bikin, di heman demê de derbarê Tengava Hurmizê de jî daxuyanî dan.
Li Behreynê zengilê hişyarkirinê hat lêdan
Wezareta Karên Hundir a Behreynê ragihand ku ji ber êrîşên hewayî, sîstemên hişyarkirinê li seranserê welêt hatine aktîfkirin.
Di daxuyaniyekê de ku ji aliyê Wezaretê ve hat weşandin, ji welatiyan û niştecihên biyanî hat xwestin ku aram bimînin, berê xwe bidin herêmên herî nêzîk ên ewle û geşedanan bi rêya çavkaniyên fermî bişopînin.
Di vê navberê de, medyaya herêmî ragihand ku li Ammanê, paytexta Urdunê, piştî êrîşên mûşekî, firîn bi awayekî demkî hatine sekinandin. Rayedarên Urdunî heta niha derbarê mijarê de daxuyaniyeke fermî nedane.
