HSD: Em ji bo parastina gelê herêmê derbasî Dêrazorê û Rojavayê Firatê bûn

PeyamaKurd - Meclisa Leşkerî ya Dêrozorê ku bi ser Hêzên Sûriya Demokratîk (HSD) ve ye, ragihand ku hêzên wan ji bo parastina gel derbasî bajarê Dêrazorê û Rojavayê çemê Firatê bûne.

Piştî êrîşên komên çekdar û vekişîna hêzên rejîma Sûriyê ji gelek herêman, HSD jî li Dêrazorê bipêş ve çûbû.

Di daxuyaniyê de hatiye gotin ku pêşketinên li Sûriyê çêdibin, xeteriyeke mezin li ser ewlehiya gel û herêma Dêrazorê çêkirine û ji ber metirsîya komên çekdarên bi ser Tirkiyê ve û çalakbûna DAIŞê li herêmê, hêzên wan li ser bingeha parastina gelê Dêrazorê derbasî bajarê Dêrazor û Rojavayê Firatê bûne.

Hate diyarkirin, “Armanca me ji vê rêveçûnê parastina ewlehiya me û gelê me ye. Ji bo wê bila dilê gelê me yê Dêrazorê rehet be. Ji bo parastina wan û ewlehiya herêmê tişta dikeve ser milê me em ê heya dawî pêk bînin. Ji bo pêşwazîkirin û alîkariya gelê me yê Dêrazorê em spasiya xwe pêşkêş dikin. Hemû gelê me jî divê bi awayek çalak li gel şervanên me mil bi mil parastina xaka xwe bike.”