Çend biryarên nû | Wê li Amedê yên derziya korona li xwe nedabin nexin govendê!

PeyamaKurd - Serokê Desteya Rêveberiya Odeya Bazirganî û Pîşesaziyê ya Diyarbekirê (DTSO) Mehmet Kaya ragihand ku wan bi sektora dawetan re civîneke derbarê tedbîrên vîrusa koronayê de pêk aniye û çend biryar hatine wergirtin.

Wekî tê zanîn li Bakurê Kurdistanê helmeta derzîkirina koronayê pir hêdî birêve diçe û gelek kes naxwazin derziyê li xwe bidin ku ev jî careke din bûye sedema zêdebûna bilez a vîrusa koronayê. Li gorî biryarên ligel Komeleya Xwediyên Kargehên Dawetan hatine wergirtin, êdî kesên ku derziya koronayê li xwe nedabin wê bo wan rê neyê dayîn ku tevlî dawetan bibin û ji bo wê jî wê xwediyê dawetan vexwendiyên dawetê agahdar bikin.

Biryarên ji bo pêşîgirtina belavbûna koronayê hatine girtin ev in:

1- Personelên salonên dawetan hemû divê derzî bibin.  

2- Wê bê maske kes nekeve cihê dawetan û heta dawet biqede wê destûr neyê dayîn ku kes makseyên xwe derxin. 

3- Wê kesên bê maske nexin hundir.  

4- Wê li salona dawetan personelek were wezîfedarkirin û ev personel wê di warê mesafeya fizîkî û bikaranîna maskeyan de hişyariyan bide.  

5- Heta dawet biqede wê anonsên maske, mesafe û paqijiyê bên kirin.  

6- Em ji xwediyên dawetan rica dikin ku bila mêvanên xwe yên doza duyem derzî nebûne venexweînin dawetan.  

7- Dê kela laşê mêvanên werin dawetê bê pîvandin û kesê ku agirê wan bi ser 38 pileyan re be nexin hundir.  

8- Di çarçoveya tedbîrên koronayê de, Komeleya Xwediyên Kargehên Dawetan wê vîdeoya mînak amade bikin û strana ku stranbêjên dawetan teşwîqî derziyê bike were çêkirin.