Çavusoglu: Biden li sûna me tawanbar bike, bila dest ji polîtîkayên xwe yên sas berde

PeyamaKurd – Wezîrê Karên Derve yê Tirkiyê Mevlut Çavuşoglu, bertek nîşanî nameya Joe Biden a li ser Rojavayê Kurdistanê da û îdîa kir, Rêveberiya Amerikayê rastiyan ji Kongresê û welatiyên xwe vedişêre û eşkere kir, li şûna Tirkiyê tawanbar bike, bila dest ji polîtîkayên xwe yên şaş berde.

Mevlut Çavuşoglu, 9ê Cotmeha 2021ê derbarê dirêjkirina biryarnameya Sûriyê û nameya Serokê Amerîkayê ya derbarê Tirkiyê de axivî û diyar kir: “Ev name nameyeke copy past e. Rêveberiya Amerîkayê dema ji Kongresa xwe re nameyan dişînin an jî zanyariyan didin xelkê Amerîkî, rastiyê nabêjin. Ew jî dizanin ku di navbera PKK û YPGê de ti cûdahiyek nîne. Piştgiriyeke baş didin vê rêxistina terorê.”

Li gor Wezîrê Karên Derve yê Tirkiyê, armanca Amerîkayê li Rojava ne şerê dijî DAIŞê ye û dibêje: “Dema em dibêjin ev li gor yasayên Amerîkayê sûc e, ev jî ji ber wê yekê ye ku em dizanin armanca wan a li wê derê ne têkoşîna dijî DAIŞê ye. Li cîhanê yek artêş heye ku dijî DAIŞê têdikoşe, ew jî artêşa me ye.”