Bakırhan bangî dayikan kir
Hevserokê DEM Partiyê Tuncer Bakırhan bang li dayikan kir û got: "Werin em soz bidin Dayikên Aştiyê, dayikên leşkerên jiyana xwe ji dest dane û Dayikên Şemiyê ku em nehêlin ev êş dubare bibe. Bila tu dayik li vî welatî neçar nemîne ku êşa windakirina zarokekî bikişîne."
RûpelNews - Bi beşdariya Tuncer Bakırhan, DEM Partiyê li Stenbolê di bin dirûşma "Civakeke Azad û Rêxistinkirî ji bo Komareke Demokratîk" de civîneke girseyî li dar xist.
Bakırhan di civînê de axivî û bal kişand ser pêwîstiya pêkanîna tam a demokrasiyê û dadmendiyê li Tirkiyeyê û her wiha tekezî li ser armanca "Komara Demokratîk" kir. Bakırhan kesên ku heta niha têkoşiyane û jiyana xwe ji dest dane bi bîr anîn û diyar kir ku ew soz didin welatekî ava bikin ku tê de demokrasi û dadmendî serdest bin, ev jî ji bo rêzgirtina li bîranîna wan e.
"Divê dayik di vê pêvajoyê de pêşengiyê bikin"
Bakırhan bal kişand ser wê yekê ku li bajarên cuda yên Tirkiyeyê serxweşî tên dayîn û got ku divê dawî li êşên heyî were anîn. Bakırhan tekezî li wê yekê kir ku divê êdî kes nemire û dayik zarokên xwe winda nekin, û bang kir ku pêvajoya aştiyê, bi taybetî ji aliyê dayikan ve, were hembêzkirin.
Bakırhan got: "Bedelên giran hatin dayîn. Ji Edirneyê heta Hekariyê, êş ya me hemûyan e. Bi îzna Xwedê, dê dayikên me êdî hêsiran nerijînin û ciwanên me nemirin. Ev pêvajo ji bo wê ye ku dayik zarokên xwe winda nekin."
Bakırhan di berdewamiya axaftina xwe de careke din bang li dayikan kir û got: "Werin em soz bidin Dayikên Aştiyê, dayikên leşkerên jiyana xwe ji dest dane û Dayikên Şemiyê ku em nehêlin ev êş dubare bibe. Bila tu dayik li vî welatî neçar nemîne ku êşa windakirina zarokekî bikişîne. Beriya her tiştî, divê dayik xwedî li vê pêvajoyê derkevin."
