Wezaretê Pêşmerge: Wêne û vîdeoyên xwe yên leşkerî ji kesî re neşînin

RûpelNews - Wezareta Pêşmerge, derbarê parvekirinên dîmenên leşkerî yên Pêşmergeyan li ser torên civakî, daxuyaniyek belavkir û ragihand:

"Hinek rûpel, hesab û kesayetiyên li ser torên civakî, ji efser û Pêşmergeyan dixwazin ku wêne û vîdeoyên beşdariya xwe ya di şeran de bi cil û bergên leşkerî ji wan re bişînin."

Wezaretê ji efser û Pêşmergeyan xwest ku di vê mijarê de gelekî baldar bin û wiha domand:

"Ji bo parastina agahiyên kesane û giştî, di vê mijarê de gelekî baldar bin. Bi ti awayî wêne û vîdeoyên taybet ên çalakiyên xwe yên leşkerî ji ti kes û aliyekî re neşînin.

Bi taybetî li ser torên civakî bi berpirsyarî û hişyariyeke mezin nêzîkî vê mijarê bibin û xwe û yekîneyên xwe yên leşkerî biparêzin."

Hişyarî li ser rûpela fermî

Wezaretê herwiha ev hişyarî da û ragihand:

"Divê were gotin ku rûpela fermî ya Wezareta Pêşmergeyan heye ku nûçe û çalakiyên xwe tê de belav dike.

Lê belê hinek rûpel û hesabên li ser torên civakî bi navên cuda, gelek caran wêne û agahiyên leşkerî belav dikin.

Ji bilî vê yekê, hinek kesan jî li ser torên civakî rûpel û hesab çêkirine."