‘Ocalan derbarê Demirtaş de daxwaz ji şandeya Îmraliyê kir'
RûpelNews - Li gorî agahiyên ku Medyascope bi dest xistine, mijara Hevserokê berê yê HDPê Selahattîn Demirtaş, ku niha li Girtîgeha Edirneyê ye, di civîna şandeya Îmraliyê ya bi Ocalan re, mijareke sereke bû. Ocalan ji şandeyê pirsa Selahattîn Demirtaş kiriye.
Şandeyê destnîşan kiriye ku her çend Demirtaş, ku di sala 2024an de ragihandibû ku ji siyaseta çalak vekişiyaye, hin rexne li pêvajo û partiyê girtibin jî, wî di heman demê de bi daxuyaniyên cuda piştgirî daye pêvajoyê. Şandeyê her wiha ji Ocalan re ragihand ku Selahattîn Demirtaş, tevî biryarên Dadgeha Mafên Mirovan a Ewropayê (DMME) berdana wî nehatiye pêkanîn, di van demên dawî de biryar daye ku bi temamî bêdeng bimîne.
Ocalan: Heger pêwîst be lêborînê ji wî bixwazin
Wekî bersiv, Ocalan gotiye, "Demirtaş yek ji kesayetiyên sereke yên vê pêvajoyê ye" û tekezî li ser girîngiya tevlîbûna wî di pêvajoyê de kiriye.
Li gorî raportê Ocalan pesnê Demirtaş daye û ji endamên şandeyê re gotiye divê partî têkiliyên xwe bi Demirtaş re sererast bike û diyar kiriye, "Heger hêrsbûnek hebe û heger pêwîst be lêborînê ji wî bixwazin."
Ocalan, pêşniyar kiriye ku ew bi xwe dikare derbarê bêdengiya Demirtaş de înîsiyatîfê bigire, û gotiye wî di hevdîtinên xwe yên bi dewletê re mijara Demirtaş jî aniye rojevê.
Li gorî raportê Ocalan, gotiye armanca pêvajoyê misogerkirina serbestberdana hemû girtiyan e, her wiha pesnê Fîgen Yuksekdag daye.
Hat ragihandin ku Ocalan, ku her wiha li ser veguherîna plankirî ya di nav tevgera siyasî de ligel pêvajoyê axiviye û gotiye, "Ji aliyê siyasî ve, ez hîn jî li cihê ku ez di sala 1978an de bûm im."
Serdana ji bo Demirtaş
Piştî civîna dawî ya ku di 27ê Adara 2026an de li Îmraliyê hat lidarxistin, hin kesayetên ji DEM Partiyê serdana Demirtaş kirin. Tê payîn ku şanda Îmraliyê di rojên pêş de serdana Girtîgeha Edirneyê jî bike.
Di vê navberê de, hat ragihandin ku Selahattîn Demirtaş, ku piştî serdana Bulent Arinç diyar kiribû ku ew dê ji bilî parêzer û hevalên xwe bi tu kesî re hevdîtinê neke, moralê wî baş e û li benda berdana xwe ye da ku bikaribe xebatên xwe bidomîne.