Li Îranê şer: Fermandarê Sûpaya Pasdaran hat kuştin

RûpelNews - Li parêzgeha Sîstan û Belûçîstanê ya li başûrê rojhilatê Îranê, di navbera hêzên ewlehiyê û kesên çekdar de pevçûnek derket. Fermandariya Qudsê, ku beşek ji Hêzên Bejayî yên Sûpaya Pasdaran e, ragihand ku General Huseyn Zarîfî, fermandarê Baregeha Operasyonê ya Şehîd Seccad a li Seravanê, di dema operasyonê de hat kuştin.

Desthilatdarên Îranê ragihandin ku Zarifî "di dema operasyoneke li dijî terorîstên kirêgirtî yên dijmin de" hatiye kuştin, lê ne diyar kirin ku kesên beşdarî pevçûnê bûne girêdayî kîjan rêxistinê bûn.

Di rojên dawî de li herêmê pevçûn rû didin

Li Sîstan û Belûçîstanê, di demên dawî de di navbera hêzên ewlehiyê yên Îranê û komên çekdar de rêze pevçûn çêbûne. Gelek komên çekdar ên Belûçî, di nav de Ceyş el-Adl, li herêmê çalak in, ku li ser sînorê bi Pakistan û Efxanistanê re ye.

Li gorî çavkaniyên Îranî, merasîma cenazeyê Zarifî dê di 25ê Îlonê de li Seravanê were lidarxistin.