Li Hesekê teqîn: Bav û kurê wî yê 13 salî mirin
RûpelNews - Di teqîna ku li ber Qesra Dadê ya li Hesekê pêk hat de du kesan jiyana xwe ji dest dan.
Li gorî Rûdaw û ajansa nûçeyan a fermî ya Sûriyê SANAyê, bûyer roja Înê, 28ê Tebaxê derdora saet 09.30an li Qada Selam, li hemberî Qesra Dadê qewimî.
Encamên destpêkê destnîşan dikin ku teqîn ji ber narincokê pêk hatiye.
Li nexweşxaneyê nekarîn bên rizgarkirin
Rêveberê Tenduristiyê li Hesekê Dr. Xalid el-Xalid, ragihand ku zilamekî di 30 salî û kurekî 13 salî, ku her du jî di teqînê de bi giranî birîndar bûbûn, rakiribûn beşa lezgîn.
El-Xalid ragihand ku bav û kur tevî destwerdanên bijîşkî yên ku hatin kirin jî jiyana xwe ji dest dan.
Hat destnîşankirin ku kesên mirî ti belgeyên nasnameyê yên fermî bi xwe re hilnedigirtin û ji ber vê yekê hewldanên ji bo tespîtkirina nasnameyên wan berdewam dikin.
Sedema teqînê di bin lêpirsînê de ye
Piştî teqînê, Hêzên Ewlekariya Navxweyî (Asayîş) li herêmê hatin bicihkirin û lêpirsînek li ser bûyerê hat destpêkirin.
Hêzên ewlehiyê lêkolînê dikin ka narincok bi qestî hatiye teqandin an teqîn ji ber xemsariyê çêbûye.
Çavkaniyeke ewlehiyê ku ji SANA re axivî herwiha piştrast kir ku teqîn ji ber narincokekê çêbûye.