Li bajarên kurdan ba û bahoz: 1 mirî, bi dehan birîndar
RûpelNews - Li navçeyên Bêrecûk û Wêranşarê yên Rihayê, ji ber baran û bagerên dijwar ên ku êvarê pêl dan, kesekî jiyana xwe ji dest da û 40 kes jî birîndar bûn.
Di daxuyaniyekê de ji ofîsa parêzgariyê hat ragihandin ku li Bêrecûkê, ji ber baran û bagerên giran dar ketine, ban firîne û lehiyên avê çêbûne; 22 kes birîndar bûne û ji wan heft kes bo nexweşxaneyên navenda bajêr hatine veguhestin. Li Wêranşarê jî 11 kes bi sivikî birîndar bûn.
Cenazeyê Nur Ç., mamosteya stajyer a ku jiyana xwe ji dest da, ji bo otopsiyê rakirin morgê.
Hemû saziyên perwerdehiyê yên li Bêrecûk û Wêranşarê ders ji bo rojekê rawestandin. Herwiha, destûra îdarî li karmendên sektora giştî yên xwedî pêwîstiyên taybet, jinên ducanî û kesên bi nexweşiyên kronîk hat dayîn.
Li Dîlokê 23 kes birîndar bûn
Baraneke ji nişka ve, ba û bahozekê piştî nîvro li Dîlokê da, bû sedem ku ban bifirin, dar ji kokê hilbên û stûnên elektrîkê hilweşin. Bi giştî 23 kes li seranserê bajêr birîndar bûn.
Parêzgariyê ragihand ku rîska lehiyê li ser Çemê Alleben bi piranî hatiye kontrolkirin û tîm li ser erdê karê xwe didomînin.
Şaredariya Mezin a Dîlokê ragihand ku di nav 20 deqeyan de 60 kîlo baran li ser metre çargoşeyekê bariye û vê bûyera hewayê wek "senaryoyeke karesatê ya ku herêmeke berfireh bandor dike" bi nav kir.
Dibistanên li navçeyên Şahînbeg, Şehîdkamil û Bêlqisê ji bo rojekê hatin girtin.
Li Mêrdînê girdelok: 4 birîndar
Li navçeya Dêrikê ya Mêrdînê, girdelokê panelên rojê yên santraleke enerjiya rojê û konteynera ku karker tê de diman, hilweşandin. Di encama serûbinbûna konteynere de çar karker birîndar bûn.
Li Artukluyê, ji ber bayê xurt trafoyek teqiya û li seranserê herêmeke berfireh bû sedema qutbûna elektrîkê. Li heman navçeyê, îskeleyê avahîsaziyê hilweşiya û zirar da sê wesayîtên parkirî.
Li Qoserê jî teyrokê zirar da wesayîtan. (Çavkanî: AA, Anka)