Kubad Talabanî bangî PDK û YNKê kir
RûpelNews - Di konferanseke çapemeniyê de ku wek beşek ji Foruma Aborî ya Delphi li Silêmaniyê hat lidarxistin, Talabanî li ser pêvajoya avakirina hikûmetê, têkiliyên di navbera Enqere û Bexdayê de, mûçeyên karmendên sivîl û pêvajoya aştiyê ya di navbera Tirkiye û PKKê de axivî.
"Pêvajoya dirêj a avakirina hikûmetê zirarê dide navûdengê me"
Li gorî Rûdawê, Talabanî diyar kir ku ew dixwazin kabîne di zûtirîn dem de were avakirin û lê zêde kir ku avanînekirina hikûmetê li ser qada navneteweyî bûye sedema encamên neyînî.
Talabanî destnîşan kir ku welatên dost û hevalbend pir caran dipirsin ka dê hikûmet kengî were avakirin û diyar kir ku dirêjkirina pêvajoyê bi awayekî neyînî bandorê li ser wêneya Hikûmeta Herêma Kurdistanê li ser qada navneteweyî dike. Talabanî, ku bal kişand ser wê yekê ku li Iraqê tevî dabeşbûnên siyasî û mezhebî hikûmetek hatiye avakirin, nîgeraniya xwe anî ziman ku li Herêma Kurdistanê ev nêzîkî 20 mehan e hikûmeteke nû nehatiye avakirin.
Bang li PDKê û YNKê kir ku hikûmetê zû ava bikin
Talabanî ku di heman demê de endamê Politburoya Yekîtiya Niştimanî ya Kurdistanê (YNK) ye, diyar kir ku êdî ji bo derengxistina avakirina hikûmetê tu hincet nemane û got ku PDK û YNK neçar in ku bi hev re hikûmetê ava bikin.
Talabanî destnîşan kir ku ne PDK û ne jî YNK dikarin bêyî aliyê din li Kurdistanê rêveberiyeke bibandor saz bikin, û tekez kir ku divê partî cudahiyên xwe yên heyî deynin aliyekî.
Talabanî, ku herwiha endamê Polîtburoya Yekîtiya Niştimanî ya Kurdistanê ye, diyar kir ku partiya wî ji bo danûstandinan amade ye û divê hikûmet li ser bingeha hevkariyeke rastîn were avakirin ku tê de berpirsiyarî, ne îmtiyaz, bên parvekirin. Wî lê zêde kir ku ew bi PDKê re li ser pêşnivîseke vîzyoneke hevpar dixebitin û daxwaza xwe anî ziman ku danûstandin ji cihê ku lê hatibûn sekinandin ji nû ve dest pê bikin.
Nirxandina serdana Mesrûr Barzanî ya Bexdayê
Talabanî her wiha behsa têkiliyên xwe yên bi Serokwezîrê Herêma Kurdistanê Mesrûr Barzanî re kir û diyar kir ku ew girîng dibîne ku di serdanên xwe yên ji bo Bexdayê de bi Serokê Iraqê re bicive.
Mijara mûçeyan
Di konferansa çapemeniyê de, Talabanî di bersiva pirsên derbarê mûçeyên karmendên sivîl de diyar kir ku çareseriya pirsgirêkê di peymaneke berfireh a di navbera Hikûmeta Federal û Hikûmeta Herêma Kurdistanê de ye.
Talabanî diyar kir ku rêveberiya Bexdayê niha li şûna çareseriyên demkî, dixwaze bi hikûmeteke çalak û parlemaneke fonksiyonel re têkiliyê deyne. Wî ragihand ku mijarên wekî dahatên petrolê, sîstema gumrikê û dahatên ne-petrolê di navbera her du aliyan de dihatin gotûbêjkirin.
Peyam li ser têkiliyên bi Tirkiyeyê re û pêvajoya aştiyê
Talabanî, ku destnîşan kir Tirkiye yek ji aktorên sereke yên aborî, siyasî û ewlehiyê yên li herêmê ye, got ku wan hewldanên cuda kirine ji bo guhertina nêzîkatiya Enqerayê, bi taybetî li hember Silêmanî û YNKê.
Piştgiriya proseya aşitiyê ya li Tirkiyeyê
Talabanî, amaje bi nîqaşên nû yên li ser proseya aştiyê ya li Tirkiyeyê kir û diyar kir ku YNK piştgiriyê dide hwlên aştiyê yên di navbera Tirkiye û PKKê de. Talabanî diyar kir ku ew bawer dikin ku ev prose dê bibe alîkar ji bo xurtkirina aramî û aştiyê li herêmê û ew amade ne ku piştgiriyê bidin ji bo misogerkirina serkeftina proseyê, heke pêwîst be.