Ji hunermend Serhat Kural 3 stranên nû: Zêrzewan, Bêdengî û Mederenge
RûpelNews - Hunermendê ji Tetwana Bedlîsê Serhat Kural piştî xebateke 3 salan 3 stranên kurdî amade kirin ku her yek mijar û çîrokên ji erdnîgariya kurdan dihewîne.
Yek ji van stranan 'Mederenge' ye ku Kural ev berhem ji herêma bav û kalê xwe li Tatvanê tomar kiriye ku berê nehatibû tomarkirin. Kural li ser çîroka vê stranê wiha diaxive:
"Yek ji berheman xebateke nenas e bi navê 'Mederenge', ku min ji amojna xwe bihîst û li Tatvanê, herêma ku ez lê dijîm, kom kir. Ev parçe bêsebiriya ku malbata zava dema ku tên bûkê bînin tê hîskirin û xwesteka wan a ku ew di zûtirîn dem de ji malê derkeve, vedibêje. Her çend ew berhemeke nenas be jî, berê ji aliyê kesî ve nehatiye pêşkêşkirin. Ez bûm yê yekem ku min ew pêşkêş kir."
"Mederenge ne tenê stranek e"
Ji bo Kural, 'Mederenge' ne tenê stranek e, lê belê rêyek e ji bo ku çanda devkî ya ku ji nifşekî ji bo nifşê din hatiye veguhestin, careke din were dîtin û bihîstin. Kural dibêje:
"Ji bo min cihê şanaziyeke mezin e ku ez berhemeke kevneşopî ya ku tu carî neketiye ber ronahiya rojê şîrove bikim ku min ew ji nifşê dê û bavê xwe, an jî heta ji nifşê beriya wê bihîstiye û wê dîsa bînim qada giştî, bi mirovan re parve bikim."
"Zêrzewan çîroka evînê ye bi metaforan hatiye honandin"
Strana duduyan jî Zêrzewan e ku gotin û muzîka 'wê' ya Xalit Tarî ye. Kural destnîşan dike ku stran xwedî vegotineke mecazî ye ku li dora hestên curbecur ên wekî lava, gazin, serhildan û sûcdariyê hatiye honandin. Li ser çîroka vê stranê jî Kural wiha diaxive:
"Li dora van hemûyan çîrokek hatiye honandin. Em dikarin jê re bibêjin çîroka evînê jî. Vegotineke li ser bingeha eyloyan û Keleha Zêrzewanê ku bi riya mecazan vedibe. Çîrokeke ku her guhdarîkirinê qateke nû eşkere dike û dest dide hestên cuda."
Bêdengî: Qêrînek e di nav bêdengiyê de
Strana dawî 'Bêdengî' balê dikişîne ser bêdengiyê bi xwe û serhildana ku di nav kesên neçarî bêdengiyê de kom dibe. Bi gotin û muzîka Serhat Ertuna, ev berhem qêrîna veşartî ya li pişt bêdengiyê tîne holê.
"Stranên kurdî bîr û zimanê kurdî zindî dihêle"
Kural tekez dike ku xebata wî ne tenê berhemeke muzîkê ye lê di heman demê de hewldanek e ji bo zindîhiştina zimanê kurdî û bîra çandî ye.
Li gorî hunermend, her straneke kurdî ne tenê awazekê, lê di heman demê de peyv, çîrok û bîranînekê jî radigihîne ku ji rabirdûyê heta îro hatiye hildan û ji bo paşerojê tê derbaskirin. Kural herî dawî dibêje:
"Her tiştê ku îro hê jî bi kurdî tê gotin, naverokeke girîng a ku di şiklê peyv û dengan de di bin xetereya jibîrkirinê de bû, tîne holê. Di heman demê de, ew ziman û bîra kurdî zindî dihêle. Ji bo min çavkaniyeke serbilindiyê ya mezin e ku ez berhemeke kevneşopî ku min ji du nifşên beriya nifşê xwe bihîstiye şîrove bikim û wê vegerînim qada giştî da ku bigihîje mirovan."