Îran: Di êrîşên Amerîkayê de 18 kesan canê xwe ji dest dan
RûpelNews - Berdevkê medyayê yê Wezareta Tenduristiyê ya Îranê Huseyîn Kermanpur, di parvekirinekê de li ser hesabê xwe yê Xê ragihand ku di êrîşên di navbera saet 20:30 a roja Yekşemê û 20:30 a roja Çarşemê de 142 kes birîndar û 18 kesan jî canê xwe ji dest dane.
Kermanpur destnîşan kir ku di nav birîndaran de 61 jin û 44 kesên di bin temenê 18 saliyê de hene. Wî herwiha got ku di nav kuştiyan de du jin û zarokek hebûn.
Aloziyên li Tengava Hurmizê
Fermandariya Navendî ya DYAyê (CENTCOM) ragihand ku êrîşan sîstemên parastina hewayî, radar, hebûnên deryayî, binke û şiyana danîna mayinan ên Sûpaya Pasdaran kirine armanc.
Di vê navberê de, Îranê ragihand ku wê êrîşên mûşekî û dronî birin ser hebûnên Amerîkayê yên li Urdun, Mîrnişînên Erebî yên Yekbûyî, Behreyn, Kuweyt û Herêma Kurdistanê.
Piştî êrîşan, Serokê DYAyê Donald Trump îdia kir ku operasyonên li dijî Îranê serkeftî bûne, di heman demê de Sekreterê Konseya Bilind a Ewlehiya Neteweyî ya Îranê Muhsin Rezayî, ragihand ku Tehran dê stratejiyeke nû ji bo li dijî şer, dîplomasî û cezayên aborî bi kar bîne.