Îdia: Ocalan dê bangeke nû bike
RûpelNews - Pêşnûmaya Yasaya Xurtkirina Hevgirtina Neteweyî û Yekbûna Civakî, ku di 10ê Tebaxê de ji aliyê Parlamentoya Tirkiyeyê ve bi 467 dengên erê hatibû pesendkirin, pêşkêşî Serokomar Recep Tayyip Erdogan hat kirin.
Ev yasaya ku dê piştî ku ji aliyê Erdogan ve were îmzekirin û di Rojnameya Fermî de were weşandin, dikeve meriyetê.
Li gorî raporeke rojnameya Turkiye, ku bi nêzîkbûna xwe ya ji hikûmetê re tê nasîn, armanc ew e ku heta destpêka Cotmehê pêvajoya pêwîst a ji bo cîbicîkirina qanûnê bê temamkirin.
Îdiayên ku dibêjin Ocalan dê bangeke nû bike
Ji bo ku qanûn bê cîbicîkirin, divê hêzên ewlehiyê piştrast bikin ku endamên PKKê çekên xwe danîne. Hat destnîşankirin ku tê payîn ev pêvajo bi qasî du mehan bidome.
Raporê destnîşan kir ku Abdullah Ocalan dê di pêşerojeke nêz de daxuyaniyeke nû bide ji bo lezandina pêvajoyê.
Hat îdiakirin ku Ocalan dê di daxuyaniya xwe de bang li endamên rêxistinê bike ku "hemû çekên xwe radestî dezgehên têkildar bikin û vegerin Tirkiyeyê".
Her wiha daxuyaniyek ji Qandilê tê payîn
Di raporê de hat gotin ku serkirdeyên PKKê yên li Qendîlê jî dê di nava çend rojan de daxuyaniyekê bidin.
Hat destnîşankirin ku tê payîn daxuyanî derbarê şikeftên ku endamên rêxistinê lê bi cih bûne û paşê vala kirine de agahiyan bide.