Efserê rûs di êrîşa bombeyî de hat kuştin!
RûpelNews - Li bajarê Sevastopolê yê li Kirimyayê, efserê rûsî di êrîşeke bombeyî de hat kuştin.
Parêzgarê Sevastopolê Mikhail Razvozhayev êrîş û girtina kesekî piştrast kir, lê nasnameyên efserê mirî û gumanbar eşkere nekirin.
Desthilatdarên rûsî îdia kirin ku jina hatî girtin li ser navê îstixbarata ukraynî tevgeriyaye. Lêbelê, Ukraynayê heta niha derbarê êrîşê de daxuyaniyek nedaye.
Kanalên rûsî: Kesê hatî kuştin Robert Şagayev e
Hin kanalên Telegramê yên rûsî îdia kirin ku efserê di êrîşê de hat kuştin Robert Şagayev bû.
Li gorî van çavkaniyan, Şagayev efserê berê yê hêzên deryayî yên Ukraynayê bû ku di sala 2014an de, sala ku Rûsyayê Kirimyayê bi xwe ve girêda, alî guhert û dilsoziya xwe ji Moskowê re ragihand.
Hat ragihandin ku berî derbasbûna aliyê din, Shagayev fermandariya binavê Zaporizhzhia yê Hêza Deryayî ya Ukraynayê kiriye.
Lêbelê, rayedarên rûsî heta niha bi awayekî fermî piştrast nekirine ku kesê hatî kuştin Shagayev e.
Malpereke Ukraynî dibêje ew "hat kuştin"
Malpera alîgirê Ukraynayê Myrotvorets jî ragihand ku Shagayev hatiye kuştin. Malpera ku agahiyan li ser kesên ku wekî sûcdarên şer an "xayîn" bi nav dike diweşîne û statuya saziyeke fermî nîne, ji bo Shagayev gotina "hat kuştin" bi kar anî.
Li gorî ajansa nûçeyan a fermî ya Rûsyayê TASS, FSBê ragihand ku jina ku bi gumanê girêdana bi êrîşê re hatiye girtin, welatiya Rûsyayê ye.