Binali Yildirim: Min fêm nekir wî çi got; ez ji ber rêzê keniyam
RûpelNews - Rahmi Koç, ku lêpirsîn li dijî wî hatiye destpêkirin, lêborîn xwest, Binali Yildirim jî cara ewil axivî.
Li gorî agahiyên ku Rêveberê Nûçeyan a Haberler.comê Olgun Kiziltepe; Binali Yildirim ji derdora xwe ya nêzîk re gotiye: "Min fêm nekir ku wî li wir çi got. Dema ku kesên li dora min keniyan, ez ji ber rêzê keniyam. Ez dê tu carî çavên xwe li hemberî bêrêziya ku li hemberî welatiyên me yên kurd tê nîşandan, negirim."
Rahmi Koç çi gotibû?
‘Pêkenok’a derbarê "nexweşeke jin a kurd" de ku ji aliyê Serokê Rûmetê yê Koç Holdingê Rahmi Koç ve di vekirina Nexweşxaneya Amerîkî ya Îzmirê de hatibû vegotin, bûbû sedema rexneyan. Koç gotibû, "Doktor guh da gilî û gazinca jina kurd û got 'Xanim, were pişt perdeyê û cilên xwe ji xwe bike,' jinikê jî bersiv da, 'Doktor, tu pêşî cilên xwe ji xwe bike.'"
Gilîname ji aliyê 16 baroyan ve hatin tomarkirin
Di daxuyaniyeke hevpar de, baroyên Semsûr, Agirî, Êlih, Çewlîg, Bedlîs, Amed, Colemêrg, Îdir, Qers, Mêrdîn, Mûş, Sêrt, Riha, Şirnex, Dêrsim û Wanê diyar kirin ku gotinên karsaz Rahmi Koç ên derbarê jinên kurd de nayên qebûlkirin.
Bahçeli: Vekirina lêpirsînê li ser Rahmi Koç şaş e
Serokê MHPê Devlet Bahçeli, ku gotinên li ser rexnekirina Rahmi Koç şaş nirxand û ev daxuyanî da:
"Koma Koçê di 100 salên borî de di pêvajoya pêşketina welatê me de berpirsiyariyên girîng girtiye ser milên xwe. Ji bilî veberhênanên xwe yên hêja yên ku beşdarî kar û karîgeriyê dibin, wê her tim bi hesteke berpirsiyariyê tevgeriyaye ji bo armanca bilindkirina Komara me bo asteke bilindtir bi hembêzkirina armancên neteweyî yên Tirkiyeyê. Di demekê de ku bi serkeftî û bi awayekî mezin 100emîn salvegera xwe pîroz dike, ne rast e ku li ser bingeha henekekî ku wî di axaftineke dostane de di dema vekirina nexweşxaneyeke li Îzmîrê, ku ew jî a heman komê ye, kiriye, lêpirsînek li dijî Birêz Rahmi Koç were destpêkirin. Em ne guncaw dibînin ku lîderê karsaziyê yê hêja, yê ku di dirêjahiya jiyana xwe ya 95 salî de bi saya perwerdehiya malbatî û prensîbên ku wî parastine, xwesteka xizmetkirina Tirkiyeyê di dilê xwe de hiştiye, bibe armanca zimanekî nepejirandî."