Bexdayê derbarê êrişa terorîstî ya li ser ofîsa Serokwezîr fermana lêpirsînê da
RûpelNews - Li gorî daxuyaniyeke ku ji aliyê Ofîsa Çapemeniyê ya Serokwezîrê Iraqê ve hatiye weşandin, Zeydî ferman da avakirina komîsyoneke lêpirsînê ya taybet ji bo lêkolînkirina hemû aliyên êrîşa li ser ofîsa taybet a Serokwezîrê Herêma Kurdistanê Mesrûr Barzanî, û mala Birêvebirê Ajansa Parastinê.
Komîsyon dê çavkaniya êrîşê, mebestên wê û cihê ku jê hatiye kirin diyar bike. Zeydî herwiha daxwaz kir ku lêpirsîn di zûtirîn dem de were temamkirin û aliyên li pişt êrîşê, ligel hemû encaman, li Iraq û Herêma Kurdistanê ji raya giştî re werin ragihandin.
Bi du dronên bombebarkirî êriş hat kirin
Dijîterora Kurdistanê ragihand ku 2 dronên bombebarkirî avêtine Ofîsa Taybet a Serokwezîr û cihê mayînê yê Berpirsê Ajansa Parastinê.
Li gorî daxuyaniya Dijîterora Kurdistanê, îro (17ê Tebaxa 2026an) demjimêr 00:28an, 2 dronên bombebarkirî yên "Hedîd-110" ji aliyê sînorê Îranê ve hatine avêtin.
Dijîterorê da zanîn ku dron berdane baregeha Ofîsa Taybet a Serokwezîrê Herêma Kurdistanê û cihê mayînê yê Berpirsê Ajansa Parastinê yên li navçeya Pîrmamê ya Hewlêrê. Her wiha hat diyarkirin ku di êrişê de zererên canî çênebûne.
Dijîterorê di daxuyaniya xwe de ev êriş şermezar kirin û got: "Em van êriş û destdirêjiyan bi tundî şermezar dikin û bi ti awayî nayên qebûlkirin, hemû berpirsyariya encaman jî di stûyê encamderan de ye."
Barzanî: Gefeke rasterast li ser ewlehî û aramiyê
Serokwezîrê Herêma Kurdistanê Mesrûr Barzanî, herwiha di parvekirineke li ser hesabê xwe yê Xê de ragihand ku êrîş ji aliyê Îranê ve hatiye kirin û piştrast kir ku hedefên êrîşê ofîsa wî ya taybet û rûniştgeha Rêveberê Ajansa Parastinê bûne.
Barzanî tekez kir ku êrîş gefeke rasterast li ser ewlehî û aramiya Herêma Kurdistanê ye.