Baregeha Heşdî Şebî ya li Mûsilê hat bordûmankirin

RûpelNews - Li gorî agahiyên ku ji çavkaniyên ewlehiyê ji AAyê re hatine dayîn, du êrîşên hewayî yên cuda li ser baregeha ku li Sehil Neynewa ya Mûsilê hatine kirin.

Çavkaniyên ku nexwestin navê xwe eşkere bikin, derbarê vê yekê de agahî nedan ku êrîş ji aliyê kê ve hatiye kirin û qurbanî hene an na.

Di heman demê de, di dîmenan de xuya dike ku ji baregeha Heşdî Şebî dûkel radibe.

Heta niha ji aliyê rayedarên îraqî ve derbarê êrîşê de ti daxuyanî nehatiye dayîn.

Artêşa Îraqê li şûna Heşdî Şebî bicih dibe

Li ser fermana Serokwezîrê Iraqê Mihemed Şiya Sudani, du lîwayên artêşê ji bo ewlekirina sînorê Herêma Kurdistanê li Deşta Mûsilê hatin bicihkirin. Yekîneyên artêşê dest bi kontrolê kirin û li şûna lîwayên Heşdî Şebî yên ku berê li herêmê bi cih bûbûn, ketin dewrê.

Li gorî biryareke ku di 7ê Adara 2026an de ket meriyetê, yekîneyên girêdayî artêşa Îraqê li herêmên sînorî yên bakur-rojhilat û başûr-rojhilatê parêzgeha Neynewayê hatin bicihkirin.

Heşdî Şebî çawa derket holê?

Komên milîsên çekdar ên bi piştgiriya Îranê, di bin sîwana Heşdî Şebî de kom bûn da ku li Îraqê li dijî rêxistina terorîst a DAIŞê şer bikin û di sala 2016an de ji aliyê dewleta Îraqê ve statuya fermî ji wan re hat dayîn.

Her çend Heşdî Şebî girêdayî dewleta Îraqê be jî, komên çekdar ên nêzîkî Îranê jî di nav de hene.