Amerîkayê hişyarî li ser Rojhilata Navîn da
RûpelNews - Balyozxaneyên DYAyê yên li Bexda, Beyrût, Kuweyt û Manamayê piştî ji nû ve gurbûna pevçûnên di navbera hûsiyan li Yemenê û Erebistana Siûdî de, daxuyaniyeke ewlehiyê weşandin.
Di hişyariyê de hat destnîşankirin ku hûsiyan cihên cuda yên li Erebistana Siûdî, di nav de balafirgehên sivîl jî, kirine hedef û hat tekezkirin ku pevçûna leşkerî ya di navbera her du aliyan de potansiyela wê heye ku bi lez gur bibe.
Wezareta Derve ya DYAyê diyar kir ku rewşa ewlehiyê li Rojhilata Navîn aloz e û "tundbûneke neçaverêkirî" dikare rû bide. Ji welatiyên amerîkî yên li herêmê hat xwestin ku hişyar bin û ji bo betalkirina firînan, girtina asîman û astengiyên di seyahetê de amade bin.
Êrîşa mûşekî li Riyadê
Hişyariyên ku piştî êrîşên nû yên hûsiyan li ser Riyadê, paytexta Erebistana Siûdî, hatin dayîn, Erebistana Siûdî roja şemiyê ragihand ku mûşekeke balîstîk a ku Riyad kiribû armanc, ji aliyê sîstemên wê yên parastina hewayî ve hatiye astengkirin.
Di heman demê de, hûsiyan ragihand ku wan bi mûşek û firokeyên bêmirov "cihên hestiyar" ên li Riyadê kirine hedef. Li depoyeke sotemeniyê ya li nêzî Balafirgeha Navneteweyî ya Şah Xalid a li Riyadê şewatek derket, di heman demê de dûmaneke zêde li herêmê hat dîtin.
Wezareta Derve ya DYAyê her wiha bang li welatiyên xwe yên li derveyî Rojhilata Navîn kir ku her cure rêwîtiya xwe ya bo herêmê an jî di ser herêmê re ji nû ve binirxînin.