Sîpor
Amerîkayê êrîş kir: 7 leşkerên Îranî mirin
Fermangeha Navendî ya Amerîkayê (CENTCOM) ragihand ku hêzên Amerîkayê li dijî Îranê êrîşên nû yên hewayî pêk anîn. Hat ragihandin ku di êrîşan de 7 leşkerên Îranî hatine kuştin.
RûpelNews - CENTCOMê li ser hesaba xwe ya medyaya civakî daxuyaniyekê weşand. Hat ragihandin ku artêşa Amerîkayê êrîş li dijî baregehên leşkerî yên Îranê yên li Tengava Hurmuzê kirin.
Di daxuyaniyê de wiha hat gotin: "Hêzên Amerîkayê îro derdora saet 13:00 bi dema herêmî pêleke êrîşên hewayî li dijî Îranê pêk anîn. Armanca êrîşan ew bû ku hêzên leşkerî yên ku ji aliyê hêzên Îranê ve ji bo êrîşkirina li ser keştiyên bazirganî yên li Tengava Hurmuzê tên bikaranîn, bêtir lawaz bikin."
Berpirsên Îranê derbarê êrîşan de daxuyaniyek weşandin. Di daxuyaniya fermî de hat ragihandin ku di êrîşên Amerîkayê de 7 leşkerên Îranê jiyana xwe ji dest dane.