Amadekarî li dijî Îranê di asta herî bilind de ne!
RûpelNews - Berpirsên payebilind ên amerîkî yên ku ji ajansa nûçeyan a Reutersê re axivîn, diyar kirin ku operasyoneke plankirî dê ji yên berê ji aliyê qadê ve pir berfirehtir be û ne tenê tesîsên atomî, herwiha binesaziya dewletê û ewlehiyê ya Îranê jî bike armanc.
Digel ku Washington li herêmê amadekariyên xwe yên leşkerî zêde dike, hewldanên dîplomatîk jî didomîne.
Tê payîn ku Nûnerê Trump ê Rojhilata Navîn Steve Witkoff û zava yê wî Jared Kushner sibê li Cenevreyê bi rayedarên Îranî re bicivin, û Oman dê wek navbeynkar tevbigere. Lêbelê, Wezîrê Derve Marco Rubio, her çend diyar kir ku çareseriyeke dîplomatîk pêşîniya Trump e jî, hişyarî da ku di şert û mercên heyî de gihîştina lihevkirinekê "pir zehmet e." Berdevka Qesra Spî Anna Kelly, tekez kir ku derbarê Îranê de "hemû bijarde li ser masê ne" û piştrast kir ku bijardeya leşkerî li ser masê dimîne.
Keştiya hewavaniyê, bi hezaran leşker û balafirên şer hatin bicihkirin
Wekî beşek ji amadekariyên leşkerî, Pentagonê keştiyeke hewavaniyê ya din, bi hezaran leşker, balafirên şer û keştiyên şer ên moşekavêj li Rojhilata Navîn bicih kirine.
Trump careke din nerazîbûna xwe ya ji bo şandina leşkerên bejayî anî ziman û got, "Tişta dawî ya ku hûn bixwazin bikin, şandina hêzên bejayî ye," di heman demê de destnîşankir ku êrîşên hewayî û deryayî dikarin li Îranê bibin sedema "guhertina rejîmê".
Trump destnîşan kir ku li Îranê "kes" hene ku dikarin hikûmetê bigirin dest û diyar kir ku guhertina rejîmê dê "tişta herî baş a gengaz" be.
Wekî bersiv, Pasdariya Şoreşa Îranê hişyarî da ku di rewşa êrîşekê de dê baregehên Amerîkayê yên li herêmê rasterast bibin armanc. Pispor dibêjin ku kapasîteyên moşekî yên Îranê ji bo hebûna Amerîkî ya li herêmê xetereyeke cidî ne. Di vê pêvajoyê de, Serokwezîrê Îsraîlê Benjamin Netanyahu jî bi Trump re hevdîtin kir û tekez kir ku divê her peymaneke bi Îranê re, berjewendiyên ewlehiyê yên jiyanî yên Îsraîlê biparêze.