Alîgirên serxwebûnê dicivin: Referandûm di rojevê de ye
RûpelNews - John Swinney, Serokê Partiya Neteweyî ya Skotlandê (SNP), Michelle O'Neill, Seroka Sinn Féin û Rhun ap Iorwerth, Serokê Plaid Cymru, dê sibê li Cardiff a paytexta Walesê, bicivin. Mary Lou McDonald, Seroka Sinn Féin a li Komara Îrlandayê, dê beşdarî civînê bibe.
Di civînê de, ku dê ji aliyê Serokê Plaid Cymru Iorwerth ve were mazûvanîkirin, dê nîqaş li ser mafê çarenûsiyê û herwiha berjewendiyên hevpar ên Skotlanda, Wales û Îrlandaya Bakur bên kirin.
Lihevkirina li ser referandûmên serxwebûnê
Li gorî raporeke di The Telegraph de, Swinney, O'Neill û Iorwerth dê memorandûmeke lêgihiştinê îmze bikin ku tê de daxwazên wan ên ji bo lidarxistina referandûmên serxwebûnê tên diyarkirin. Tê ragihandin ku sê serok bi vê pêngavê armanc dikin ku zexta li ser Serokwezîrê Brîtanyayê, Andy Burnham, zêde bikin.
Digel ku partiyên alîgirê serxwebûnê li Skotlanda û Walesê li ser desthilatê ne, li Îrlandaya Bakur modelek parvekirina desthilatê heye. Erkê Wezîrê Yekem ê Herêmî ji aliyê O'Neill ve tê meşandin, ku piştgiriya serxwebûn û yekbûna bi Îrlandayê re dike, lê erkê Cîgira Wezîrê Yekem ji aliyê Emma Little-Pengelly ve tê meşandin, ku piştgiriya Brîtanyayê dike.
Burnham berê diyar kiribû ku ew dê piştgiriya referandûmên serxwebûnê yên li Skotlanda û Îrlandaya Bakur neke.
Beriya civîna Cardiffê, Swinney got, "Baştir e Burnham xwe amade bike ku bibe serokwezîrê dawî yê Îngîltereyê. Ji bo cara yekem di dîrokê de, Skotlanda, Wales û Îrlandaya Bakur ji aliyê rêveberiyên alîgirê serxwebûnê ve tên birêvebirin."