Ahmet Turk: Amedspor tîmeke Tirkiyeyê ye lê ruhê wê yê Kurdistanî heye
RûpelNews - Daxuyaniya Ahmet Turk a ji bo RûpelNewsê derbarê bilindbûna Amedsporê bo Lîga Super ku gotibû "Em gelek kêfxweş in. Tîmeke Kurdistanê gihîştiye Lîga Super" bertekên berfireh bi xwe re anî. Bi taybetî di nav qada siyasî û raya giştî de bû mijara rojev.
Şêwirmendê Sereke yê Serokomar Oktay Saral bersiv da gotinên Ahmet Turk û got, "Li ser vê axê dewleteke bi navê 'Kurdistan' nîne û dê ti carî jî çênebe. Dema tu diaxivî, divê tu sînorên xwe, cihê xwe û hedê xwe bizanibî."
Di heman demê de, Serokê BBPê Mustafa Destici bersiveke tund da Turk û got: "Kurdistana çi! Ev Komara Tirkiyeyê ye. Heger ji te re ne xweş e, bicehime here."
"Ez Destici bi cidî nagirim"
Ahmet Turk di hevpeyvîneke bi Îlke TVyê re, li ser bertekên li hember gotinên wî yên derbarê "pêvajoya aştiyê" û bilindbûna Amedsporê bo Lîga Super şîrove kir.
Tirk wiha got:
"Ez Mustafa Destici cidî nagirim. Ew ne kesek e ku hêjayî bersivdanê be. Dema em dibêjin 'Kurdistan', em ne tenê behsa kurdan dikin. Li vir suryanî, ermenî, ereb û gelên din ên gelek hene. Ev hemû gelên Kurdistanî ne. Amedspor tîmeke Tirkiyeyê ye, lê di dawiyê de ruhekî Kurdistanî heye; xelkê stran gotin, gotinên kurdî bi kar anîn û bi kurdî bi hev re axivîn. Ev di werzîşê de şewqvedana ziman û çanda gelekî ye. Divê em vê yekê qebûl bikin. Heger hûn vê yekê qebûl nekin, hûn dê tu carî nekaribin li vî welatî aştiyê saz bikin. Hûn dê nekaribin bigihîjin biratiyê."