Tulay Hatimogulları: Gotinên min bi şaşî hatin fêmkirin

RûpelNews - Di axaftina xwe ya ji bo ajansa MAyê de, Hevseroka DEM Partiyê Tulay Hatimogulları behsa nîqaşên derbarê daxuyaniyên xwe yên di bernameyeke televîzyonê de kir û her wiha li ser yasaya çarçoveyê ya ku vê dawiyê ji aliyê Parlamentoyê ve hatibû pejirandin, axivî.

Hatimogulları diyar kir ku di bernameya televîzyonê de behsa bandorên herêmî yên pêvajoya aştiyê dikir û destnîşan kir ku gotinên wê li ser medyaya civakî bi şaşî hatine fêmkirin. Wê bal kişand ser pêwîstiya derxistina pêş a aliyên erênî yên yasayê —ku bi dengên hejmareke mezin a parlamenteran hatibû pejirandin û got ku divê pêvajo derbasî qonaxa din bibe.

"Em li kêleka gelê Filistînê ne"

Hatimogulları anî ziman ku çareserkirina pirsgirêka kurd li Tirkiyeyê bi rêbazên demokratîk û aştiyane dê ji bo aştiya herêmê encamên girîng bi xwe re bîne û destnîşan kir ku pêşveçûnên Tirkiyeyê di vê pêvajoyê de dikarin beşdariyê li çareserkirina pirsgirêkên din ên li herêmê jî bikin.

Hatimogulları diyar kir ku gavên ji bo çareserkirina pirsgirêka kurd û pêşxistina demokratîkbûnê têne avêtin, dê bandoreke erênî li ser pirsgirêka Filistînê jî bikin û got: "Derbarê pirsgirêka Filistînê de, em li kêleka gelê Filistînê ne. Çawa ku duh li kêleka wan bûn, îro jî em li kêleka wan in."

Hatimogulları nêrîna xwe anî ziman ku eger Tirkiye pirsgirêka Kurd li ser bingeheke demokratîk çareser bike, dê beşdariya wê ya dîplomatîk a ji bo çareserkirina pirsgirêka Filistînê jî bihêztir û bibandortir bibe. Her wiha Hatimoğulları polîtîkayên Serokwezîrê Îsraîlê Benjamin Netanyahu rexne kirin û diyar kir ku Xezze û cihên din ên li herêmê rastî êrîşên giran tên; wê her wiha destnîşan kir ku pirsgirêka Filistînê yek ji pirsgirêkên bingehîn ên herêmê ye.