Trump: Me bixwesta, Îran dê careke din li ser piyan nemaya
RûpelNews - Serokê Amerîkayê Donald Trump, di derbarê êrîşên li ser Îranê de axivî û got: "Em li hember Îranê nazik tevdigerin. Em dikarin tiştên ewqas xirab bikin ku, heger em bixwazin, em dikarin santralên wan ên elektrîkê ji kar bixin; Îran dê careke din nikaribe ser piyan bisekine. Em vê yekê nakin."
Trump di hevpeyvîneke li ser Radyoya Fox News de bersiva pirsên derbarê rojeva Îranê de da.
Wekî bersiv ji bo pirsa, "Hûn dê çawa bizanibin ku şerê bi Îranê re dê kengê bi dawî bibe?", Trump got, "Ez nafikirim ku ew ê zêde dem bigire. Ew dê wê demê dawî bibe gava ku ez di hestên xwe de hîs bikim," û bi vê yekê baweriya xwe ya bi hestên xwe yên di vê mijarê de anî ziman.
'Me bixwesta, me dikaribû elektrîkê qut bikin’
Trump, tekez kir ku wan zirareke girîng daye kapasîteyên leşkerî yên Îranê û dê êrîşên xwe bidomînin, got, "Em dê hefteya bê hê dijwartir li wan bixin."
Serokê Amerîkayê diyar kir ku ew pêwîstiya derketina xelkê Îranê ya kolanan qebûl dike lê ev yek zehmet e, û got ku Amerîka di vî warî de li gel gelê Îranê dimîne, û wiha anî ziman: "Rêjîma li Îranê dê bikeve, lê belkî di pêşerojeke nêz de ne."
Trump diyar kir ku wan hêza deryayî, sîstemên mûşekan, binesaziya atomî û sîstemên radarê yên Îranê "wêran kirine", û destnîşan kir ku her çend eger bixwesta dikaribû gelek êrîşên din pêk bîne da ku rasterast zirarê bide binesaziya welêt, lê wan ev yek nekiriye.
Trump wiha got: "Em li hember Îranê nazik tevdigerin. Em dikarin tiştên ewqas xirab bikin ku, heger em bixwazin, em dikarin santralên wan ên elektrîkê ji kar bixin û Îran dê careke din nikaribe ser piyan bisekine. Em vê yekê nakin. Em hewl didin ku di vî warî de nerm tevbigerin."
Îdiayên derbarê birîndarbûna Mucteba Xameneyî
Di vê navberê de, dema ku derbarê rewşa niha ya Mucteba Xameneyî, kurê serokê berê yê Îranê Ayetullah Ali Xameneyi yê ku di êrîşa Amerîka û Îsraîlê de hatibû kuştin, pirs jê hat kirin, Trump diyar kir ku ew jî birîndar bûye.
Trump, ku amaje pê kir Mucteba Xameneyî ji aliyê bavê xwe ve ji bo serokatiyê nehatibû destnîşankirin, got, "Ew dipirsin ka ew sax e. Gelek kes hewl didin fêr bibin. Lê ez bawer dikim ew sax e, her çend ew birîndar bûbe jî."
'Dibe ku Putin hinekî alîkariya Îranê bike'
Trump got ku dibe Serokê Rûsyayê Vladimir Putin "hinek" alîkariyê bide Îranê, di demekê de ku êrîşên Amerîka û Îsraîlê li ser Îranê û lêdanên tolhildanê yên Tehranê berdewam bûn.
Dema jê hat pirsîn ka gelo Putin alîkariya Îranê dike, Trump bersiv da, "Ez bawer dikim ku ew dibe ku hinekî alîkariya wan bike, erê, texmîna min ev e."
Di heman demê de, dema jê hat pirsîn ka ew ê operasyoneke leşkerî ji bo desteserkirina uranyuma dewlemendkirî ya li Îranê pêk bînin, Trump bersiv da, "Na, em ê nekin. Em niha ne li ser wê yekê disekinin, lê dibe ku di pêşerojê de bikin."